မြန်မာနိုင်ငံတွင် အမြဲနေထိုင်ခွင့် (PR) ရရှိပြီးသူများနှင့် နိုင်ငံခြားသားအဖြစ် ခံယူထားသော မူလမြန်မာနိုင်ငံဖွား အထူးကုဆရာဝန်များနှင့် ဆရာဝန်များနှင့်ပတ်သက်သော ကန့်သတ်အထွေထွေဆေးကုသခွင့် လိုင်စင်နှင့် ကန့်သတ်အထူးဆေးကုသခွင့် လိုင်စင်ကြေးများကို သုံးလစာ စုပေါင်းပေးသွင်းခြင်းမျိုး မပြုလုပ်တော့ဘဲ တစ်လချင်းလိုအပ်ချက်နှင့်အညီ ပေးသွင်းနိုင်ရန် စီစဉ်ထားကြောင်း မြန်မာနိုင်ငံဆေးကောင်စီမှ သိရသည်။
“ လိုင်စင်ကြေးနှုန်းထား သတ်မှတ်ချက်တွေကို လျှော့ချကောက်ခံသွားမယ့်အပြင် အရင်ကလို တစ်ကြိမ်မှာ သုံးလစာစုပေါင်း သွင်းတာမျိုးမဟုတ်ဘဲ တစ်လချင်း လိုအပ်ချက်နှင့်အညီပေးသွင်းသွားနိုင်ဖို့လည်း စီစဉ်ထားပါတယ်။ လိုင်စင်ကြေးလျှော့ချတာကို ၂၀၂ဝပြည့်နှစ် ဇန်နဝါရီ ၁ရက်ကစပြီး စတင်ဆောင်ရွက်သွားမှာပါ” ဟု မြန်မာနိုင်ငံ ဆေးကောင်စီ ဥက္ကဋ္ဌ ဒေါက်တာအက်စ်ကျော်လှက ပြောကြားသည်။
လိုင်စင်ကြေးများ ဖြေလျှော့ပေးနိုင်ရေးကိစ္စများ ဆောင်ရွက်ရန် ဒီဇင်ဘာ ၁ ရက်က ကျန်းမာရေးနှင့်အားကစားဝန်ကြီးဌာန ပြည်ထောင်စုဝန်ကြီးနှင့် မြန်မာနိုင်ငံဆေးကောင်စီမှ တာဝန်ရှိသူများ ဆွေးနွေးခဲ့ကြကြောင်း သိရသည်။
မြန်မာနိုင်ငံသားဆရာဝန်များအတွက် အထူးဆေးကုသခွင့်လိုင်စင် (Specialist Licence) များကို ဒီဇင်ဘာ ၃ ရက်မှစ၍ ထုတ်ပေးမည်ဖြစ်ကြောင်း မြန်မာနိုင်ငံဆေးကောင်စီက ၂၀၁၈ ခုနှစ် နိုဝင်ဘာ ၂၂ ရက်က ထုတ်ပြန်ကြေညာခဲ့သည်။
ယင်းကြေညာချက်တွင် မြန်မာနိုင်ငံ ဆေးကောင်စီသည် သတ်မှတ်အရည်အချင်း နှင့်ပြည့်စုံသူ မြန်မာနိုင်ငံသား ဆရာဝန် များအတွက် အထူးဆေးကုသခွင့်လိုင်စင် (Specialist Licence) ထုတ်ပေးရန် လျှောက်လွှာခေါ်ယူထားပြီးဖြစ်ရာ လိုင်စင် ထုတ်ပေးနိုင်ရန်အတွက် မြန်မာနိုင်ငံ ဆေးကောင်စီမှ သတ်မှတ်ထားသော အရည်အချင်းနှင့်ပြည့်စုံပြီး အထွေထွေဆေးကုသခွင့် လိုင်စင်ရရှိထားပြီးသူ မြန်မာနိုင်ငံသားဆရာဝန်များအနေဖြင့် အထူးဆေးကုသခွင့်လိုင်စင်အတွက် လျှောက်လွှာတင်စဉ်က လိုအပ် သောစာရွက်စာတမ်းများ ပြည့်စုံစွာတင်ပြထားပါက အထူးဆေးကုသခွင့်လိုင်စင်များကို ၂၀၁၈ခုနှစ်၊ ဒီဇင်ဘာ ၃ ရက်မှစ၍ အစိုးရရုံး ပိတ်ရက်များမှအပ ရုံးချိန်အတွင်း မြန်မာနိုင်ငံ ဆေးကောင်စီထံ အထွေထွေ ဆေးကုသခွင့်လိုင်စင် မူရင်းကိုတင်ပြလျက် ဘာသာရပ်အမည်၏ ရှေ့ဆုံးအင်္ဂလိပ်စကားလုံး အက္ခရာစဉ်အတိုင်း လာရောက်ထုတ်ယူနိုင်ကြောင်း ကြေညာထားသည်။
လျှောက်လွှာတင်စဉ် ဓာတ်ပုံများ ပူးတွဲပေးပို့ထားခြင်းမရှိသူ ဆရာဝန်များအနေဖြင့် ၂၀၁၈ ခုနှစ်၊ နိုဝင်ဘာ၂၈ ရက်နောက်ဆုံးထား၍ မြန်မာနိုင်ငံဆေးကောင်စီထံ ပေးပို့ရန်နှင့် လူကိုယ်တိုင်လာရောက် ထုတ်ယူခြင်းမပြုနိုင်ပါက ကိုယ်စားလှယ်လွှဲစာနှင့်အတူ သက်ဆိုင်ရာဆရာဝန်၏ အထွေထွေ ဆေးကုသခွင့် လိုင်စင်မူရင်းကို တင်ပြလျက် ကိုယ်စားလှယ်တစ်ဦးမှ ဆရာဝန်တစ်ဦးစီအတွက်သာ ကိုယ်စားထုတ်ယူနိုင်ကြောင်း သိရသည်။
အထူးဆေးကုသခွင့်လိုင်စင်အတွက် မြန်မာနိုင်ငံဆေးကောင်စီမှ ခွင့်ပြုပေးသော ဘာသာရပ်နယ်ပယ်မှအခြားသို့ပြောင်းရွှေ့ လျှောက်ထားလိုပါက ပြောင်းရွှေ့လိုသော ဘာသာရပ်နယ်ပယ်ဆိုင်ရာ အထောက်အထား စာရွက်စာတမ်းများကို ပြည့်စုံစွာတင်ပြပြီး ၂၀၁၉ ခုနှစ်၊ ဇန်နဝါရီ ၇ ရက်မှစ၍ ပြန်လည်လျှောက်ထားနိုင်ကြောင်းနှင့် သတ်မှတ်ထားသောရက်အတွင်း လာရောက်ထုတ်ယူနိုင်ခြင်းမရှိသော အထူးကုဆရာဝန်များအနေဖြင့် ဒီဇင်ဘာ ၁၁ ရက်နောက်ပိုင်းမှသာ ရက်အကန့်အသတ်မရှိ ရုံးချိန်အတွင်း လာရောက်ထုတ်ယူနိုင်ကြောင်း အသိပေးကြေညာခဲ့သည်။
မြန်မာနိုင်ငံဆေးကောင်စီက မြန်မာနိုင်ငံသား ဆရာဝန်များအတွက် အထူးဆေးကုသခွင့်လိုင်စင် ထုတ်ပေးမည်ဖြစ်ကြောင်း ယခုနှစ်၊ မေလ နောက်ဆုံးပတ်အတွင်းက ထုတ်ပြန်ကြေညာခဲ့ပြီး သတ်မှတ်အရည်အချင်းနှင့်ပြည့်စုံသည့် အထွေထွေဆေးကုသခွင့် လိုင်စင်ရရှိထားပြီးသူ ဆရာဝန်များသည် မြန်မာနိုင်ငံဆေးကောင်စီထံ ၂၀၁၈ခုနှစ် ဇွန်လ ၁ ရက်မှစ၍ အထူးဆေးကုသခွင့်လိုင်စင် စတင်လျှောက်ထားခွင့်ပြုခဲ့သည်။
-
မြန်မာ-တရုတ်နယ်စပ် စီးပွားရေး ပူးပေါင်းဆောင်ရွက်မှုဇုန် တည်ထောင်ရေးတွင် မြန်မာနိုင်ငံ၏ နယ်နိမိတ်ပိုင်နက် နယ်မြေဆုံးရှုံးမှု မရှိစေရေး၊ နှစ်နိုင်ငံအကြား နယ်နိမိတ်သတ်မှတ်ချက်ကို အလေးထားဆောင်ရွက်ရန် စီးပွား/ကူးသန်းဝန်ကြီး ပြောကြား
-
မြန်မာနိုင်ငံဆိုင်ရာ ဂျပန်သံအမတ်ကြီးနှင့် ပြည်ထောင်စုဝန်ကြီးတွေ့ဆုံ၍ ဂျပန်နိုင်ငံကူညီမှုဖြင့် ဆောင်ရွက်နေသည့် ရန်ကုန်မြို့ပတ်ရထားလမ်းနှင့် ရန်ကုန် -မန္တလေး ရထားလမ်း အဆင့်မြှင့်တင်ရေးစီမံကိန်းများ ဆွေးနွေး
-
တရုတ်-မြန်မာ နှစ်နိုင်ငံအကြား တိုက်ရိုက်လေကြောင်းခရီးစဉ်ပျံသန်းသည့် ၁၃ ခုမြောက် တရုတ်လေကြောင်းလိုင်းအဖြစ် Qingdao လေကြောင်းလိုင်း နင်းပေါ်-ရန်ကုန် တိုက်ရိုက်လေကြောင်းခရီးစဉ် စတင်ပျံသန်း
-
အမေရိကန်-တရုတ် ကုန်သွယ်ရေးစစ်ပွဲကြောင့် မြန်မာနိုင်ငံသို့ပြောင်းရွှေ့လုပ်ကိုင်လိုသည့် နိုင်ငံတကာလုပ်ငန်းရှင်များရှိသော်လည်း သုံးလအတွင်း မြေနေရာရရှိရေးဆောင်ရွက်မပေးနိုင်သဖြင့် အာဆီယံနိုင်ငံများသို့ သွားရောက်လုပ်ကိုင်နေကြောင်း ဝန်ကြီးနော်ပန်းသဥ္ဇာမျိုး ပြောက
-
၂၀၂၀ ပြည့်နှစ် မော်တော်ယာဉ်တင်သွင်းမှုမူဝါဒဆိုင်ရာ Model Year သတ်မှတ်ချက် ထွက်ရှိလာပြီး မော်တော်ယာဉ်တင်သွင်းမှု အစီအစဉ်အားလုံးတွင် ယခင်နှစ်ထက် ထုတ်လုပ်သည့်ခုနှစ် တစ်နှစ်စီထပ်တိုး
