အိမ်အကူမိန်းကလေးကို အက်စစ်ဖြင့် ပက်သည်ဟုဆိုကာ သရုပ်ဆောင်မင်းရာဇာ အပါအဝင် သုံးဦးအား မြောက်ဥက္ကလာပမြို့နယ် ရွှေပေါက္ကံနယ်မြေရဲစခန်းတွင် ပုဒ်မ လေးခုဖြင့် အမှုဖွင့်ထားကြောင်း မြောက်ဥက္ကလာပမြို့နယ် မဲဆန္ဒနယ်အမှတ် (၂) တိုင်းဒေသကြီး လွှတ်တော်ကိုယ်စားလှယ် ဦးမြင့်လွင်က The Daily Eleven သတင်းစာသို့ အတည်ပြုပြောကြားသည်။
သရုပ်ဆောင်မင်းရာဇာ၊ ဇနီးဖြစ်သူနှင့် ယောက္ခမဖြစ်သူတို့ သုံးဦးကို အိမ်အကူ အမျိုးသမီး၏ မိခင်ဖြစ်သူက တရားလိုပြုလုပ်ပြီး ဧပြီ ၇ ရက် ညနေပိုင်းက အမှုဖွင့် တိုင်ကြားခြင်းဖြစ်ကြောင်း သိရသည်။
ဖြစ်စဉ်မှာ တရားလိုဖြစ်သူသည် လွန်ခဲ့သည့် ရက်အနည်းငယ်က Facebook လူမှုကွန်ရက်စာမျက်နှာ၌ သရုပ်ဆောင်မင်းရာဇာ၏ဇနီး တင်ထားသည့် လူမှုရေးဖောက်ပြန်မှု အသံဖိုင်ကို သိရသည့်အတွက် သမီးဖြစ်သူထံ သွားရောက်မေးမြန်းခဲ့ကြောင်း သိရသည်။
ထိုသို့မေးမြန်းရာ ရွှေပေါက္ကံရှိ နေအိမ်သို့ သရုပ်ဆောင်မင်းရာဇာနှင့် ၎င်း၏ဇနီးတို့ရောက်ရှိလာပြီး ဘောင်းဘီချွတ်၍ အက်စစ်ဖြင့် ပက်ခဲ့ကြောင်း၊ လွန်ခဲ့သည့်နှစ်ရက်ခန့်ကလည်း မင်းရာဇာ၏ ယောက္ခမဖြစ်သူက ဦးခေါင်းကို တူဖြင့်ထုခြင်းကြောင့် သွေးထွက်ဒဏ်ရာများရရှိသည်ဟု ပြောကြားခြင်းကြောင့် ၎င်းက တရားလိုပြုလုပ်၍ အမှုဖွင့် တိုင်ကြားခြင်းဖြစ်သည်ဟု ရဲမှတ်တမ်းအရ သိသည်။
“ အမှုဖွင့်ထားတာ ဟုတ်ပါတယ်။ ပုဒ်မ က ၃၂၄၊ ၃၂၅၊ ၃၅၄ လို့ ပြောတယ်။ မနေ့က ညနေ ၃ နာရီလောက်က အမှုဖွင့်ထားတာပါ” ဟု မြောက်ဥက္ကလာပမြို့နယ် မဲဆန္ဒနယ်အမှတ် (၂) တိုင်းဒေသကြီးလွှတ်တော် ကိုယ်စားလှယ် ဦးမြင့်လွင်က ပြောကြားသည်။
အမှုနှင့်ပတ်သက်ပြီး ရွှေပေါက္ကံရဲစခန်းသို့ သွားရောက်မေးမြန်းရာ တာဝန်ရှိသူများက ယင်းအမှုနှင့်ပတ်သက်၍ မြောက်ဥက္ကလာပဆေးရုံကြီးတွင် ရဲလုပ်ငန်းစဉ်များ သွားရောက်လုပ်ဆောင်လျက်ရှိကြောင်း ပြောကြားသည်။
လက်ရှိတွင် အက်စစ်ဖြင့်အပက်ခံရသည့် အိမ်အကူအမျိုးသမီးမှာ မြောက်ဥက္ကလာပဆေးရုံ သားဖွားမီးယပ်ဆောင် (၂) ၌ ဆေးကုသမှုခံယူလျက်ရှိကြောင်း သိရသည်။
အဆိုပါအမှုဖြစ်စဉ်နှင့်ပတ်သက်ပြီး ရွှေပေါက္ကံရဲစခန်းက သရုပ်ဆောင်မင်းရာဇာပါ သုံးဦးကို (ပ) ၅၀၅၊ ရာဇသတ်ကြီးပုဒ်မ ၃၂၄/၃၂၅ /၃၅၄ နှင့်၁၁၄ စသည့် ပုဒ်မများဖြင့် အမှုဖွင့်ထားပြီး ဆက်လက်စစ်ဆေး ဆောင်ရွက်လျက်ရှိကြောင်း သိရသည်။
-
ရုရှားနိုင်ငံထဲက ပစ်မှတ်များကို တိုက်ခိုက်ရန် အမေရိကန်ပံ့ပိုးပေးသော ဝာာဝေးပစ်ဒုံးကျည်များအား ယူကရိန်း ပထမဆုံး အသုံးပြုရေးကို သမ္မတဂျိုးဘိုင်ဒင် ခွင့်ပြု
-
ရလဒ်က အရေးကြီးပေမဲ့ အသင်းတိုးတက်လာရင် ရလဒ်က နောက်ကလိုက်လာပါလိမ့်မယ်
-
ဆီမြွန်နီနေရာ အစားထိုးရန် အက်သလက်တီကိုအသင်း ရှာဖွေနေပြီး အရန်အသင်းနည်းပြ ဖာနန်ဒိုတောရက်စ် ရေပန်းစားနေ
-
တာမွေမြို့နယ် မြန်မာ့ဂုဏ်ရောင်အိမ်ရာဝန်းအတွင်းရှိ မြို့ဦးပရိယတ္တိစာသင်တိုက်တွင် လက်လုပ်လက်ပစ်ဗုံးတစ်လုံး ပေါက်ကွဲမှုကြောင့် ဆရာတော်တစ်ပါး ပျံလွန်တော်မူ
-
မန္တလေးမြို့ရှိ ဖုန်းဆိုင်တစ်ဆိုင်တွင် အမျိုးသမီးတစ်ဦးက ဆိုင်ဝန်ထမ်းအား ဓားဖြင့်လှမ်းထိုးကာ လုယက်ရန် ကြံစည်
