Top News

မန်ယူနည်းပြ တန်ဟက်ဂ်က အသင်းကစားသမားများသည် ၎င်း၏ ကစားပုံကို ရင်းနှီးလာပြီဖြစ်ပြီး ယခုထက်ပိုမိုတိုးတက်လာဦးမည်ဖြစ်ကြောင်း ပြောကြားခဲ့သည်။ 

မန်ယူအသင်းသည် ယခုရာသီ ပရီးမီးယားလိဂ် အဖွင့်နှစ်ပွဲဆက်တိုက် ရှုံးနိမ့်ခဲ့သော်လည်း နောက်ဆုံးကစားသည့် သုံးပွဲဆက် အနိုင်ရရှိခဲ့သည်။ မန်ယူအသင်းသည် ပြီးခဲ့သည့် ကြာပတေးနေ့က ကစားခဲ့သည့် ပရီးမီး ယားလိဂ်ပွဲစဉ်တွင် အဝေးကွင်း၌ လက်စတာ အသင်းကို (၁-၀) ဂိုးဖြင့် အနိုင်ရခဲ့သလို ပွဲကိုလည်း ထိန်းချုပ်ကစားနိုင်ခဲ့သည်။ မန်ယူအသင်းအနေဖြင့် ယနေ့ တွင် ယခုရာသီ ပရီးမီးယားလိဂ်၌ ရာနှုန်းပြည့် အနိုင်ရထားသည့် အာဆင်နယ်အသင်းကို အိမ်ကွင်း၌ လက်ခံကစားရမည်ဖြစ်သည်။ 

တန်ဟက်ဂ်က "မန်ယူအသင်းက အပေါင်းလက္ခဏာဆောင်တဲ့အရာတွေကို မြင်နေရပါတယ်။ အသင်းတည်ဆောက်မှုကလည်း စနေပြီ။ ကျွန်တော်တို့က အသင်းကို ပြန်လည်တည်ဆောက်နေပြီး အခု အစပြုနေပြီဖြစ်ပါတယ်။ ကျွန်တော်တို့အနေနဲ့ တစ်ပွဲပြီးတစ်ပွဲ အသင်းကို တည်ဆောက်နေသလို ပိုပြီးလည်း တိုးတက်လာတယ်။ လက်ရှိ အသင်းရဲ့ ရလဒ်တွေက လေ့ကျင့်ရေးကွင်းမှာ ကြိုးစားတာတွေ၊ ပွဲကစားရင်း ကြိုးစားမှုတွေကြောင့် ဖြစ်လာတာပါ။ ကစားကွက်၊ အခွင့်အရေးဖန်တီးမှုနဲ့ မှန်ကန်တဲ့ ဆုံးဖြတ် ချက်တွေချနိုင်ဖို့ ကျွန်တော်တို့ ကြိုးစားနေပြီး ဘောလုံးပိုင်ဆိုင်မှုအတွက်လည်း ကျွန်တော် လုပ်ဆောင်နေတယ်။ အခုမှ အစပဲရှိသေးလို့ အသင်းအနေနဲ့ အခုထက်ပိုပြီး တိုးတက်လာဦးမှာပါ"ဟု ပြောကြားခဲ့သည်။ 

မန်ယူအသင်းသည် ပရီးမီးယားလိဂ် ပွဲစဉ် ၅ အပြီးတွင် သွင်းဂိုး ခြောက်ဂိုးသာ ရရှိထားသော်လည်း နောက်ဆုံးသုံးပွဲဆက်တိုက်Clean Sheet ရရှိထားသည်။  တန်ဟက်ဂ်က အာဆင်နယ်အသင်းနှင့်ကစားမည့်ပွဲမှာ မိမိတို့အတွက် စမ်းသပ်မှုဖြစ်လာမည်ဖြစ်ကြောင်း ပြောကြားခဲ့သည်။ 

"အာဆင်နယ်က ခက်ခဲတဲ့ ပြိုင်ဘက် ပါ။ သူတို့ဟာ ဒီရာသီကို အကောင်းဆုံးစတင်နိုင်ခဲ့ပါတယ်။ နည်းပြကလည်း အသင်းကို ကိုင်တွယ်လာတာ ကြာပြီဆိုတော့ သူတို့ အသားကျနေပါပြီ။ အာဆင်နယ်နဲ့ ကစားမယ့်ပွဲက ကျွန်တော်တို့အတွက် အရမ်းကို ကောင်းတဲ့ စမ်းသပ်မှုဖြစ်လာမှာပါ"ဟု တန်ဟက်ဂ်က ပြောကြားခဲ့သည်။