ရီးယဲလ်မက်ဒရစ်အသင်းတိုက်စစ်မှူး ယိုဗစ်က ၎င်းအနေဖြင့် ယခုနွေရာသီအပြောင်းအရွှေ့ကာလအတွင်း အသင်းမှ အငှားဖြင့် ထွက်ခွာရဖွယ်ရှိသည်ဆိုသော သတင်းများမှာ မဟုတ်မှန်ကြောင်း ငြင်းဆန်သွားခဲ့သည်။
အသက် (၂၁) နှစ်အရွယ်ရှိ ဆားဘီးယားတိုက်စစ်မှူး ယိုဗစ်သည် ယခုနွေရာသီအပြောင်းအရွှေ့တွင်မှ ဖရန့်ဖတ်အသင်းမှ ရီးယဲလ်အသင်းသို့ ယူရိုသန်း (၆၀) ဖြင့် ပြောင်းရွှေ့ခဲ့သူဖြစ်သည်။
ယိုဗစ်သည် ရီးယဲလ်အသင်း၏ ရာသီကြိုခြေစမ်းပွဲစဉ်များတွင် ခြေစွမ်းပြနိုင်ခဲ့ခြင်းမရှိသဖြင့် အသင်းနည်းပြ ဇီဒန်းက ၎င်းကို အငှားချထားရန် စီစဉ်နေကြောင်း သတင်းများထွက်ပေါ်ခဲ့သည်။
သို့သော် ယိုဗစ်က အဆိုပါသတင်းများမှာ မဟုတ်မှန်ကြောင်းနှင့် နည်းပြ ဇီဒန်းအနေဖြင့် မိမိအပေါ် ယုံကြည်မှုအပြည့်ရှိကြောင်း တုံ့ပြန်ခဲ့သည်။
ယိုဗစ်က "ရီးယဲလ်အသင်းကနေ ကျွန်တော် အငှားထွက်ကစားမယ်ဆိုတဲ့ သတင်းတွေကို ဖတ်ရပါတယ်။ ဒါတွေက မီဒီယာတွေ ဖန်တီးတဲ့ ပုံပြင်တွေ ဖြစ်ပါတယ်။ အဲဒီသတင်းတွေကို ဖတ်ပြီး ကျွန်တော်ကတော့ ရယ်နေရုံပါပဲ။ ကစားသမားဘဝတစ်လျှောက်မှာ ဒီလိုသတင်းမျိုးတွေ အများကြီး ဖတ်ခဲ့ရပါတယ်။ အမှန်တရားကို အချိန်က သက်သေပြသွားပါလိမ့်မယ်။ နည်းပြ ဇီဒန်းက ကျွန်တော့်အပေါ် ယုံကြည်မှုအပြည့်ရှိပါတယ်။ အခုအချိန်မှာ နေ့တိုင်း သင်ယူလေ့လာပြီး ဒီအတောအတွင်း ဇီဒန်းရဲ့ အမြင်လည်း ပြောင်းလဲသွားမယ်လို့ ကျွန်တော် မထင်ပါဘူး။ ဇီဒန်းလက်အောက်မှာ ကစားခွင့်ရတဲ့အတွက် ကျွန်တော် အရမ်းပျော်နေပါတယ်"ဟု ပြောကြားခဲ့သည်။
ထို့ပြင် ယိုဗစ်က မိမိအနေဖြင့် အကောင်းဆုံးခြေစွမ်းရရှိရန် နီးစပ်နေပြီဖြစ်ကြောင်းနှင့် ရီးယဲလ်အသင်းအတွက် အစွမ်းကုန်ကြိုးစားပေးသွားမည်ဖြစ်ကြောင်း ပြောကြားခဲ့သည်။
-
နယူးဒေလီမြို့တော်တွင် မီးခိုးမြူများ ဖုံးလွှမ်းမှုကြောင့် မူလတန်းကျောင်းအားလုံး ပိတ်ထားခဲ့ရ
-
ဖိလစ်ပိုင်တွင် စူပါတိုင်ဖွန်းမန်-ယီ တိုက်ခတ်မှုကြောင့် သစ်ပင်များနှင့် ဓာတ်တိုင်များ လဲကျ
-
eSports လောကသို့ဝင်ရောက်ရန် ဆွေးနွေးမည်ဟု ဘိုင်ယန်မြူးနစ်အသင်း ဘုတ်အဖွဲ့ဥက္ကဋ္ဌ ရူမင်နစ်ဂီ ပြောကြား
-
အာဖဂန်နစ္စတန်မှ ဆုတ်ခွာခဲ့ပြီးနောက် အမေရိကန်သည် စူပါပါ၀ါနိုင်ငံ မဟုတ်တော့ဟု ဗြိတိန် ကာကွယ်ရေးဝန်ကြီးက ပြောကြား
-
မြန်မာနိုင်ငံသို့ သွားရောက်နိုင်ရေး အာဆီယံအထူးကိုယ်စားလှယ်အနေဖြင့် ကြိုးပမ်းနေဆဲဟု မလေးရှား နိုင်ငံခြားရေးဝန်ကြီး ပြောကြား
