ချမ်းသာသည့် နိုင်ငံများအနေဖြင့် ကလေးသူငယ်များအား ကိုဗစ်ကာကွယ်ဆေး ထိုးပေးနေမှုကို ရပ်တန့်ကြရန်နှင့် ၎င်းအစား ကာကွယ်ဆေးများကို ဆင်းရဲသည့်နိုင်ငံများအတွက် လှူပေးကြရန် WHO က မေ ၁၄ ရက်တွင် မေတ္တာရပ်ခံတောင်းဆိုလိုက်သည်။
COVID-19 ကပ်ဘေးနှင့် ရင်ဆိုင်နေရသည်မှာ နှစ်နှစ်ထဲသို့ ရောက်လာပြီဖြစ်ပြီး ပထမနှစ်ထက် ပိုပြီးလူသေဆုံးမှုများလာမည့်ပုံရှိသည်ဟုလည်း WHO အကြီးအကဲက သတိပေးခဲ့သည်။
ချမ်းသာသည့် နိုင်ငံအများစုတွင် ယခု ကလေးများနှင့် ဆယ်ကျော်သက်များအား ကာကွယ်ဆေးများ ထိုးပေးလျက်ရှိပြီး ဆင်းရဲသည့်နိုင်ငံများတွင်မူ ကျန်းမာရေးဝန်ထမ်းများနှင့် ရောဂါကူးရန် အလားအလာအများ ဆုံးလူများအား ကာကွယ်ဆေးထိုးနိုင်ရန် အနိုင်နိုင်ဖြစ်နေသည့်အတွက် WHO အကြီးအကဲ တက်ဒရို့စ်အက်ဒါနွမ်က ဒေါသထွက်နေခြင်းဖြစ်သည်။
ငယ်ရွယ်ကျန်းမာသူများအား ကာကွယ်ဆေးထိုးပေးမည့်အစား ကမ္ဘာ့အဆင်းရဲဆုံးနိုင်ငံများအတွက် ကိုဗစ်ကာကွယ်ဆေးများ ဝေမျှပေးမည့် WHO ၏ COVAX အစီအစဉ်တွင် ဆေးများပါဝင်လှူဒါန်းပေးကြရန် မစ္စတာတက်ဒရို့စ်က တောင်းဆိုခဲ့သည်။
စိတ်မချမ်းသာစွာ မြင်တွေ့နေရသည်မှာ ကာကွယ်ဆေးများ သိမ်းကြုံးဝယ်ထားသည့် ချမ်းသာသည့်နိုင်ငံများတွင် ရောဂါကူး နိုင်ခြေနည်းသူများအထိ ကာကွယ်ဆေးထိုးလာကြသည်ကိုတွေ့ရပြီး ဝင်ငွေနည်း၊ ဝင်ငွေ အလယ်အလတ်ရှိသည့်နိုင်ငံများတွင်မူ ကျန်းမာရေးဝန်ထမ်းများကိုပင် ထိုးပေးရန် ဆေးအလုံအလောက် ရှိမနေဘဲဆေးရုံများတွင် အရေးပေါ်အသက်ကယ်ရန်လိုနေသူများဖြင့် ပြည့်နေသည်ဟု WHO အကြီးအကဲက ဆိုသည်။
အေအက်ဖ်ပီ သတင်းဌာန၏တွက်ချက်မှုအရ ကမ္ဘာတဝန်းတွင် ကိုဗစ်ကာကွယ်ဆေးအလုံးရေ ၁.၄ ဘီလီယံနီးပါးထိုးနှံပြီးစီးခဲ့ပြီး ၎င်းအနက် ၄၄ ရာခိုင်နှုန်းက ဝင်ငွေမြင့်သည့်နိုင်ငံများတွင် ထိုးထားခြင်းဖြစ်ကာ ဝင်ငွေအနိမ့်ဆုံးနိုင်ငံ ၂၉ နိုင်ငံတွင် ထိုးနှံပြီးသည့်ဆေးအလုံးရေမှာ ၀.၃ ရာခိုင်နှုန်းသာ ရှိသေးသည်ဟု သိရသည်။
ယခုကဲ့သို့ ကာကွယ်ဆေးလက်လှမ်းနိုင်မှုတန်းတူမရှိပုံဖြင့် ယခင်နှစ်ထက်ယခုနှစ်တွင် လူသေဆုံးမှုပိုလာနိုင်ကြောင်းနှင့် အများပြည်သူ ကျန်းမာရေးစည်းကမ်းများနှင့် ကာကွယ်ဆေးထိုးခြင်းကို ပူးတွဲလုပ်ဆောင်ခြင်းသည်သာ တစ်ခုတည်းသော အသက်ကယ်နည်းဟု WHO အကြီးအကဲက ဆိုသည်။
၂၀၁၉ ခုနှစ် ဒီဇင်ဘာတွင် တရုတ်နိုင်ငံမှ စတင်ပေါ်ပေါက်လာသည့် နိုဗယ်ကိုရိုနာဗိုင်းရပ်စ်ကြောင့် ယနေ့တစ်ကမ္ဘာလုံးတွင် သေဆုံးသူပေါင်း ၃.၃ သန်းကျော် ရှိလာပြီဖြစ်သည်။ အသက် ၅၆ နှစ်အရွယ်ရှိ မစ္စတာတက်ဒရို့စ်သည်လည်း WHO အခြေစိုက်ရာ ဆွစ်ဇာလန်နိုင်ငံ၊ ဂျနီဗာမြို့တွင် ယခုတစ်ပတ် အစောပိုင်းက ကိုဗစ်ကာကွယ်ဆေးထိုးနှံခဲ့ပြီးဖြစ်သည်။
ကာကွယ်ဆေးထိုးထားပြီးသည့်တိုင် ကူးစက်မှုများသည့် နေရာများတွင် နှာခေါင်းစည်း ဆက်ဝတ်ဆင်ကြရန်လည်း WHO က အကြံပြုထားသည်။
-
အင်းလေးကန် အရှေ့ဖက်ကမ်းရှိ Inle Princess Resort ဟိုတယ် မီးလောင်မှုဖြစ်ပွား
-
ဆရာ၊ ဆရာမများနှင့် ကျောင်းသား၊ ကျောင်းသူများ ပါဝင်သော တက္ကသိုလ်လေ့ကျင့်ရေးတပ်များ၏ မိုးရာသီစခန်းချ လေ့ကျင့်ရေး သင်တန်းဆင်းပွဲများကျင်းပ
-
တန်ဆောင်မုန်းလပြည့်ည ရန်ကုန်မြို့ ပြည်သူ့ရင်ပြင် စျေးရောင်းပွဲတော်နှင့် ဂီတပွဲတော်မြင်ကွင်းများ
-
ပြိုင်ဆိုင်မှုပြင်းထန်ဦးမယ့် ESM ခြေလှမ်းများ
-
ရေးမြို့၊ အောင်မင်္ဂလာရပ်ကွက်လုံးကျွတ် တန်ဆောင်တိုင်ဆွမ်းကြီးလောင်းပွဲနှင့် နိဗ္ဗာန်ဈေးအလှူပွဲ မြို့ခံပြည်သူများ၊ ဒေသခံပြည်သူများဖြင့် စည်ကား
