Top News

မန်ယူအသင်း၏ နာမည်ကျော်နောက်ခံလူဟောင်းတစ်ဦးဖြစ်သည့် ပြင်သစ်လက်ရွေးစင်ဟောင်း ပက်ထရစ်အီဗရာက ဝက်စ်ဟမ်းနှင့်ပွဲတွင် ပယ်နယ်တီပေးခဲ့ရခြင်းအတွက် သူ၏ တစ်နိုင်ငံတည်းသား ပေါ့ဘာအပေါ်  ဝိုင်းဝန်းဝေဖန်နေကြသော်လည်း ခြေစွမ်းညံ့ဖျင်းခဲ့သည့် ရပ်ရှ်ဖို့ဒ်ကို ဝေဖန်ရန်အတွက်မူ လက်ရှောင်နေကြသည်ဟု ပြောကြားခဲ့သည်။

    

မန်ယူအသင်းသည် ယင်းပွဲတွင် ပေါ့ဘာ၏ လက်ထိဘောကြောင့် ပယ်နယ်တီပေးခဲ့ရခြင်းဖြစ်ပြီး ယင်းပယ်နယ်တီကို ဝက်စ်ဟမ်းအသင်းက ဦးဆောင်ဂိုးအဖြစ် သွင်းယူခဲ့ခြင်းဖြစ်ကာ မေဆင်ဂရင်းဝုဒ်၏ ချေပဂိုးကြောင့် သရေကျခဲ့ခြင်းဖြစ်သည်။ 

ပေါ့ဘာ၏ လက်ထိဘောအတွက်မူ ဝေဖန်မှုများရှိနေပြီး ယင်းကဲ့သို့ ဝေဖန်နေကြသူများထဲတွင် မန်ယူကစားသမားဟောင်း ဂယ်ရီနဗီးလ်လည်း ပါဝင်ခဲ့သည်။ 

ယင်းအတွက်ကြောင့် အီဗရာက "ဒီပွဲက မန်ချက်စတာယူနိုက်တက်အတွက် ဘယ်လောက်ခက်ခဲသလဲဆိုတာကို ကျွန်တော်သိပေမယ့် တချို့သောကစားသမားတွေရဲ့ စွမ်းဆောင်ရည်အတွက်တော့ ကျွန်တော် တော်တော်လေးစိတ်ပျက်မိပါတယ်။ လူတွေက ပေါ့ဘာနဲ့ပတ်သက်ပြီး တော်တော်လေး ရက်ရက်စက်စက်သုံးသပ်နေကြပြီး သူ့ရဲ့လက်ထိဘောကြောင့် ပယ်နယ်တီပေးလိုက်ရတဲ့အတွက်ပါ။ ဒါပေမဲ့ ရပ်ရှ်ဖို့ဒ်ရဲ့ ခြေစွမ်းပိုင်းနဲ့ပတ်သက်ပြီး ဘယ်သူကမှ ပြင်းပြင်းထန်ထန်ဝေဖန်နေတာမျိုးကိုတော့ ကျွန်တော် မတွေ့ရဘူး။ ရပ်ရှ်ဖို့ဒ်လည်း ဒီနေ့ကစားတာ အရမ်းညံ့ပါတယ်"ဟု ပြောကြားခဲ့သည်။

အီဗရာက ယင်းကဲ့သို့ ပြောခဲ့သော်လည်း ဂယ်ရီနဗီးလ်သည် ပွဲကစားချိန်အတွင်းတွင် ရပ်ရှ်ဖို့ဒ်အား ဝေဖန်မှုများ ပြုလုပ်ခဲ့သည်။ 

ဂယ်ရီနဗီးလ်က "ရပ်ရှ်ဖို့ဒ်အတွက်တော့ နောက်ဆုံး(၁၅)မိနစ်ဟာ တော်တော်လေးစိတ်ပျက်စရာပါပဲ။ ခြေစွမ်းပိုင်းတင်မဟုတ်ဘဲ ကြံ့ခိုင်မှုပိုင်းမှာလည်း တော်တော်လေးထိခိုက်နေပါတယ်။ မန်ချက်စတာယူနိုက်တက်အသင်းကလည်း ပြီးခဲ့တဲ့ FA ဖလားပွဲမှာ ကစားသမား တချို့ကို အနားပေးခဲ့ပေမယ့် အဲဒီအကျိုးသက်ရောက်မှုကို ဒီပွဲမှာ မမြင်ရပါဘူး။ ဆိုးလ်ရှားက မူလ(၁၁)ယောက်ကို ပြန်သုံးခဲ့လို့ပါ။ ဒီညက သူတို့အတွက် အကောင်းဆုံးညတွေထဲက တစ်ညမဖြစ်ခဲ့ပါဘူး"ဟု ဆိုခဲ့သည်။