Top News

အက်သလက်တီကိုမက်ဒရစ်အသင်း အမှုဆောင်ချုပ် ဂီလ်မာရင်က မြို့ခံပြိုင်ဘက် ရီးယဲလ်မက်ဒရစ်အသင်းမှ ကိုလံဘီယာကွင်းလယ်လူ ဟာမီးစ်ရိုဒရီဂွက်ဇ်ကို ခေါ်ယူလိုကြောင်း ဝန်ခံပြောကြားခဲ့သည်။

အက်သလက်တီကိုမက်ဒရစ်အသင်း အမှုဆောင်ချုပ် ဂီလ်မာရင်က မြို့ခံပြိုင်ဘက် ရီးယဲလ်မက်ဒရစ်အသင်းမှ ကိုလံဘီယာကွင်းလယ်လူ ဟာမီးစ်ရိုဒရီဂွက်ဇ်ကို ခေါ်ယူလိုကြောင်း ဝန်ခံပြောကြားခဲ့သည်။

အသက် (၂၈) နှစ်အရွယ်ရှိ ကိုလံဘီယာလက်ရွေးစင် ဟာမီးစ်ရိုဒရီဂွက်ဇ်သည် ပြီးခဲ့သည့် ၂၀၁၇-၁၈ ရာသီနှင့် ၂၀၁၈-၁၉ ရာသီများတွင် ဘိုင်ယန်မြူးနစ်အသင်း၌ အငှားသွားရောက်ကစားခဲ့ပြီး ယခုနွေရာသီအပြောင်းအရွှေ့ကာလအတွင်း ရီးယဲလ်မက်ဒရစ်အသင်း ရောင်းချလိုသည့် ကစားသမားစာရင်းတွင် ပါဝင်နေသူဖြစ်သည်။

ဟာမီးစ်ရိုဒရီဂွက်ဇ်အား ခေါ်ယူရန် နာပိုလီအသင်းက စိတ်ဝင်စားနေပြီး အပြောင်းအရွှေ့ဖြစ်မြောက်ရန်လည်း အလွန်နီးစပ်နေကြောင်း ဥရောပမီဒီယာများက ဖော်ပြနေကြသည်။

အက်သလက်တီကိုမက်ဒရစ်အသင်း အမှုဆောင်ချုပ် ဂီလ်မာရင်က "ဟာမီးစ်ရိုဒရီဂွက်ဇ်ကို အသင်းတိုင်းက လိုချင်ကြတယ်ဆိုတာ ကျွန်တော် ကောင်းကောင်းသိပါတယ်။ သူက အလွန်တော်တဲ့ ကစားသမားတစ်ဦးဖြစ်ပြီး ကျွန်တော်တို့အသင်းကို ပိုကောင်းအောင် လုပ်ပေးနိုင်မယ့် ကစားသမားလည်း ဖြစ်ပါတယ်။ ဟာမီးစ်ရိုဒရီဂွက်ဇ်ကို ကျွန်တော်တို့အသင်းနည်းပြ ဆီမြွန်နီ သဘောကျတယ်ဆိုတာကိုလည်းကျွန်တော် သိပါတယ်။ ပြီးတော့ ရီးယဲလ်မက်ဒရစ်အသင်းက သူ့ကို မလိုချင်သလို၊ သူကလည်း ရီးယဲလ်အသင်းက ထွက်ခွာချင်နေတယ်ဆိုတာကိုလည်း ကျွန်တော် သိပါတယ်။ ဒါပေမဲ့ ကျွန်တော်တို့အနေနဲ့ သူ့ကို ခေါ်ယူဖို့ ကြိုးစားရာမှာတော့ အခြေအနေတွေအများကြီး ရှိပါတယ်။ ဟာမီးစ်ရိုဒရီဂွက်ဇ်ကိုသာ ခေါ်ယူနိုင်ခဲ့မယ်ဆိုရင် တကယ်ကောင်းမှာပါ။ ဒါပေမဲ့ ဒီကိစ္စမှာ ဆုံးဖြတ်ချက်ချမယ့်သူက ရီးယဲလ်မက်ဒရစ်အသင်းဥက္ကဋ္ဌ ပီရက်ဇ်ပဲ ဖြစ်ပါတယ်"ဟု ပြောကြားခဲ့သည်။

အက်သလက်တီကိုအသင်းသည် ယခုနွေရာသီအပြောင်းအရွှေ့ကာလအတွင်း ကစားသမားရောင်းချမှုမှ ယူရို (၃၀၇.၅) သန်းအထိ ရရှိထားပြီး ယင်းထဲမှ ယူရို (၂၁၆) သန်းကို အသုံးပြုကာ ကစားသမားသစ် (၉) ဦးအထိ ခေါ်ယူခဲ့သည်။

သို့သော် အက်သလက်တီကိုအသင်းသည် အပြောင်းအရွှေ့စျေးကွက်တွင် ကစားသမားသစ်များ ထပ်မံခေါ်ယူရန် စီစဉ်နေကြောင်း သိရသည်။