Facebook သည် ၎င်း၏ ဝက်ဘ်ဆိုက်ပေါ်မှ အစိုးရဆန့်ကျင်ရေး အကြောင်းအရာများအား ဖယ်ရှားပေးရန် ငြင်းဆန်ခြင်းဖြင့် ဆိုက်ဘာလုံခြုံရေး ဥပဒေသစ်ကို ချိုးဖောက်ခဲ့သည်ဟု ဗီယက်နမ်အစိုးရက စွပ်စွဲခဲ့သည်။ ယင်းသည် အဆိုပါဥပဒေသစ် စတင်အသက်ဝင်ပြီး ရက်ပိုင်းအတွင်း ပထမဆုံးအရေးယူမှု ဖြစ်ခဲ့သည်။
အမေရိကန်၊ ဥရောပသမဂ္ဂနှင့် ဝက်ဘ်ဆိုက်လွတ်လပ်ခွင့်အဖွဲ့များထံမှ ပြစ်တင်ဝေဖန်မှုများ ထွက်ပေါ်စေခဲ့သည့် အဆိုပါဥပဒေသည် ဇန်နဝါရီ ၁ ရက်ကမှ ဗီယက်နမ်တွင် စတင်အသက်ဝင်ခဲ့ခြင်းဖြစ်သည်။ ယင်းဥပဒေသစ်အရ အင်တာနက်ကုမ္ပဏီများသည် အဆိပ်အတောက်ဖြစ်စေသော အကြောင်းအရာများအားဖယ်ရှားခြင်း၊ အာဏာပိုင်တို့က တောင်းဆိုပါက အသုံးပြုသူတို့၏ အချက်အလက်များကို လွှဲပြောင်းပေးခြင်းတို့ လုပ်ဆောင်ရမည်ဖြစ်သည်။
ထို့ပြင် ဘဏ်များနှင့် အီလက်ထရွန်နစ် ကုန်သွယ်ရေးအပါအဝင် ကုမ္ပဏီများသည် တစ်ပါတီစနစ် ဗီယက်နမ်တွင် ဆာဗာများ ထားရှိပေးရမည်ဟုလည်း တောင်းဆိုထားသဖြင့် အချက်အလက်နှင့် အတွင်းရေးများ ချိုးဖောက်ခံရခြင်း၊ ဆိုက်ဘာလုံခြုံရေး ခြိမ်းခြောက်ခြင်းတို့ ရှိမည့်အပေါ် စိုးရိမ်မှုများ မြင့်တက်လာသည်။
အစိုးရဆန့်ကျင်ရေး လှုပ်ရှားမှုများရှိသည်ဟု စွပ်စွဲခံထားရသော ပေ့ချ်များကို ဖြုတ်ချပေးရန် သတင်းအချက်အလက်နှင့် ဆက်သွယ်ရေးဝန်ကြီးဌာန၏ တောင်းဆိုမှုအတိုင်း လုပ်ဆောင်ပေးရန် Facebook က ပျက်ကွက်ခဲ့သည်ဟု ဇန်နဝါရီ ၉ ရက်က အစိုးရရုပ်သံ Vietnam Television တွင် ထုတ်လွှင့်ခဲ့သည်။
ထို့ပြင် Facebook သည် ငွေစက္ကူအတု၊ ကုန်ပစ္စည်းအတု၊ လက်နက်များ၊ ဗျောက်အိုးများ အစရှိသည့် တရားမဝင်ထုတ်ကုန်များအား ကြော်ငြာမှုများကိုလည်း လက်ခံထားသည်ဟု ဗီယက်နမ်အာဏာပိုင်တို့က စွပ်စွဲခဲ့သေးသည်။ ဥပဒေကို ချိုးဖောက်သည့်အတွက် ပြစ်ဒဏ်ကို မထုတ်ပြန်သေးပေ။
အဆိုပါဥပဒေသည် နိုင်ငံထဲမှ ဆိုက်ဘာလုံခြုံရေးတိုးတက်စေရန် ရည်ရွယ်ထားသည်ဟု အစိုးရက ဆိုသော်လည်း အလွန်တင်းကျပ်လှသော တရုတ်အင်တာနက်စည်း မျဉ်းများက ရောင်ပြန်ဟပ်နေသည့် ယခု ဥပဒေသည် အွန်လိုင်းပေါ်မှ အစိုးရဆန့်ကျင်သူများကို ငြိမ်သက်စေရန် ရည်ရွယ်ခြင်း ဖြစ်သည်ဟု ဝေဖန်သူများက ဆိုကြသည်။
Facebook ကမူ ဒေသဆိုင်ရာဥပဒေ နှင့် အညီဆောင်ရွက်သော အကြောင်းအရာ တားမြစ်ပိတ်ပင်မှုတို့သည် ပွင့်လင်းမြင်သာမှုရှိသည်ဟု အေအက်ဖ်ပီသတင်းဌာနသို့ ဇန်နဝါရီ ၉ ရက်တွင် ပြောကြားခဲ့သည်။
အမှီအခိုကင်းသော ပုံနှိပ်မီဒီယာများ၊ လူထုဆန္ဒပြပွဲများကို ပိတ်ပင်ထားသော ကွန်မြူနစ်နိုင်ငံ ဗီယက်နမ်တွင် လူမှုမီဒီယာသည် တက်ကြွ လှုပ်ရှားသူများအတွက် အရေးပါသော ပလက်ဖောင်းတစ်ခုဖြစ်သည်။ လက်ရှိ အချိန်အထိ ဗီယက်နမ်နိုင်ငံတွင် Facebook သည် တက်ကြွ လှုပ်ရှားသူများအတွက် ရေပန်းအစားဆုံး အရာဖြစ်နေဆဲဖြစ်သည်။
-
အာရှအားကစားပြိုင်ပွဲ၏ အမျိုးသားဘောလုံးပြိုင်ပွဲတွင် ဂျပန်ကို မြန်မာအသင်း (၇)ဂိုးပြတ်အရေးနိမ့်
-
သထုံမြို့နယ် အနန်းပင်ကျေးရွာအနီး သထုံ - ပေါင် ခရိုင်ချင်းဆက်လမ်းတွင် မော်တော်ယာဉ်တစ်စီးအရှိန်လွန်တိမ်းမှောက်မှုကြောင့် လူ ၂၀ ဦးထက်မနည်း ထိခိုက်ဒဏ်ရာရ
-
မြန်မာနိုင်ငံ အလယ်ပိုင်းဒေသ ငါးခုတွင် ရာသီဥတု ပြောင်းလဲမှုများနှင့် မြေဆီလွှာ တိုက်စားမှု လျှော့ချရန်အတွက် ရေဝေရေလဲ နေရာငယ်များတွင် ဒေသနှင့် ကိုက်ညီသည့်သစ်ပင်များ စိုက်ပျိုးထိန်းသိမ်းမှု ပြုလုပ်
-
ဖွံ့ဖြိုးမှုအနည်းဆုံးနိုင်ငံများ (LDC) တွင် မြန်မာနိုင်ငံသည် နိုင်ငံခြား တိုက်ရိုက်ရင်းနှီးမြှုပ်နှံမှု အများဆုံး ရရှိခဲ့ပြီး မကြာမီ LDC စာရင်းဝင်နိုင်ငံအဖြစ်မှ လွတ်မြောက်တော့မည်ဟု ကုလသမဂ္ဂ အစီရင်ခံစာ၌ ဖော်ပြ
-
ဟေတီတွင် ရာဇဝတ်ဂိုဏ်းများနှင့် ဆက်နွှယ်သည့် အကြမ်းဖက်မှုများကြောင့် လူ ၂၀,၀၀၀ ကျော် ဘေးလွတ်ရာထွက်ပြေးတိမ်းရှောင်
