ကာလကြာနှောင့်နှေးခဲ့သော၊ အစီအစဉ်မကျခဲ့သော၊ အငြင်းပွားဖွယ်ရာများ ဖြစ်ပေါ်ခဲ့သော ကွန်ဂိုသမ္မတ ရွေးကောက်ပွဲတွင် အတိုက်အခံ ကိုယ်စားလှယ်လောင်း ဖီးလစ်ရှီဆေကေဒီက အံ့အားသင့်ဖွယ် အနိုင်ရခဲ့ကြောင်း ဇန်နဝါရီ ၁၀ ရက် အစောပိုင်းတွင် ကြေညာခဲ့ရာ မြို့တော်ရှိ လမ်းများပေါ်တွင် အတိုက်အခံ ထောက်ခံသူများက အောင်ပွဲခံခဲ့ကြသည်။
သို့သော် ၎င်း၏ပြိုင်ဘက် အတိုက်အခံ ခေါင်းဆောင် မာတင်ဖေယူလုက ထိုရလဒ်များသည် ရာထူးမှ ထွက်ခွာတော့မည့် လက်ရှိ သမ္မတ ဂျိုးဇက်ကာဘီလာက ရှီဆေကေဒီနှင့် နောက်ကွယ်တွင် အပေးအယူ လုပ်ခဲ့သည့် မသမာသော ရလဒ်ဖြစ်ကြောင်း စွပ်စွဲခဲ့သည်။
အကျင့်ပျက်ခြစားမှု တိုက်ဖျက်သူ ဖေယူလု အား အနိုင်မရစေရန်အတွက် ကာဘီလာသည် ရှီဆေကေဒီနှင့် အပေးအယူလုပ်ခဲ့ဖွယ် ရှိကြောင်း ဖေယူလုနှင့် သံတမန်များ၊ လေ့လာသူများက ပြောကြားခဲ့ကြသည်။
ထောက်ခံမဲ ၃၈ ရာခိုင်နှုန်းဖြင့် အနိုင်ရခဲ့သည်ဟု ရွေးကောက်ပွဲကော်မရှင်က ကြေညာခဲ့သည့် ရှီဆေကေဒီသည် အနိုင်ရရန် တစ်ပြေးနေသူ မဟုတ်ဘဲ လူသိနည်းခဲ့သည်။ ဖခင်ဖြစ်သူ ကွယ်လွန်သူ အတိုက်အခံခေါင်းဆောင် အီသီယန်နီ၏ အရိပ်မိုးမှု ခံထားရသော ရှီဆေကေဒီသည် ရွေးကောက်ပွဲမတိုင်မီ ဖေယူလုနှင့် အတိုက်အခံ မဟာမိတ်ဖွဲ့ထားမှုမှ နုတ်ထွက်ခဲ့ပြီး ကိုယ့် ကိုယ်ကိုယ် ယှဉ်ပြိုင်ခဲ့ခြင်း ဖြစ်သည်။
ရှီဆေကေဒီ အနိုင်ရခဲ့သည့် ရလဒ်သည် အကြံအဖန် လုပ်ထားသော၊ မမှန်မကန် ဖန်တီးထားသော ရွေးကောက်ပွဲဆိုင်ရာ ဓားပြတိုက်ခံရမှုဖြစ်ပြီး မဲဆန္ဒရှင်များ၏ စစ်မှန်သော ဆန္ဒကို မထင်ဟပ်ကြောင်း ဖေယူလု က အလျင်အမြန် ရှုတ်ချခဲ့သည်။ Exxon ကုမ္ပဏီ မန်နေဂျာဟောင်းနှင့် ကင်ရှာဆာ ဥပဒေပြု အမတ်ဖြစ်သော ဖေယူလုသည် ထောက်ခံမဲ ၃၄ ရာခိုင်နှုန်း ရရှိခဲ့ကြောင်း ရွေးကောက်ပွဲကော်မရှင်က ထုတ်ပြန်ခဲ့သည်။ ထောက်ခံမဲ ၂၃ ရာခိုင်နှုန်းသာ ရရှိခဲ့သည့် ကာဘီလာ၏ အာဏာရ ပါတီကိုယ်စားလှယ်လောင်း အီမန်နျူရယ်ရာမာဇာနီရှာဒရီ၏ မျှော်လင့်ချက် မှေးမှိန်နေစဉ် ရှီဆေကေဒီအား အနိုင်ရသူအဖြစ် ကြေညာရန် ကာဘီလာ အစိုးရက အပေးအယူလုပ်ခဲ့ကြောင်း ဖေယူလုက စွပ်စွဲခဲ့သည်။ ထိုရလဒ်များအား အတည်ပြုရန် ဖွဲ့စည်းအုပ်ချုပ်ပုံ အခြေခံဥပဒေတရားရုံးက ၁၄ ရက် အချိန်ရမည် ဖြစ်သည်။
၂၀၀၆ ခုနှစ်တွင် ယန်းပီးယားဘမ်ဘာ၏ အနိုင်ရမှု ခိုးယူခံရကြောင်း၊ ၂၀၁၁ ခုနှစ်တွင် အီသီယန်နီရှီဆေကေဒီ၏ အောင်ပွဲ ခိုးယူခံရကြောင်း၊ ၂၀၁၈ ခုနှစ်တွင် မာတင်ဖေ ယူလုထံမှ အောင်ပွဲခိုးယူခံရမှု အဖြစ်မခံနိုင်ကြောင်း ဖေယူလုက ပြောကြားခဲ့သည်။ စောင့်ကြည့်သူ ၄၀,၀၀၀ ပါသည့်အဖွဲ့ကို စေလွှတ်ခဲ့သော သြဇာကြီး ကက်သလစ်ဘုရားကျောင်းက ၎င်းတို့၏ ရလဒ်များကို ထုတ်ပြန်ပေးရန် ဖေယူလုက တိုက်တွန်းခဲ့သည်။ ၎င်းတို့၏ လေ့လာမှုများအရ အနိုင်ရသူတစ်ဦးအား ရှင်းရှင်းလင်းလင်း သိခဲ့ရပြီး ဖြစ်ကြောင်း ကက်သလစ် ဘုရားကျောင်းက ပြီးခဲ့သော သီတင်းပတ်တွင် ထုတ်ပြန်ခဲ့သည်။
-
မြန်မာနှင့် လက်ဘနွန်အသင်း၏ ခြေစမ်းပွဲလက်မှတ်များ ရောင်းချနေပြီး ရုပ်သံမှ တိုက်ရိုက်ပြသမည်
-
တက်ကျမ်းစာပေ
-
အာရှအားကစားပြိုင်ပွဲ၏ အမျိုးသားဘောလုံးပြိုင်ပွဲတွင် ဂျပန်ကို မြန်မာအသင်း (၇)ဂိုးပြတ်အရေးနိမ့်
-
သထုံမြို့နယ် အနန်းပင်ကျေးရွာအနီး သထုံ - ပေါင် ခရိုင်ချင်းဆက်လမ်းတွင် မော်တော်ယာဉ်တစ်စီးအရှိန်လွန်တိမ်းမှောက်မှုကြောင့် လူ ၂၀ ဦးထက်မနည်း ထိခိုက်ဒဏ်ရာရ
-
မြန်မာနိုင်ငံ အလယ်ပိုင်းဒေသ ငါးခုတွင် ရာသီဥတု ပြောင်းလဲမှုများနှင့် မြေဆီလွှာ တိုက်စားမှု လျှော့ချရန်အတွက် ရေဝေရေလဲ နေရာငယ်များတွင် ဒေသနှင့် ကိုက်ညီသည့်သစ်ပင်များ စိုက်ပျိုးထိန်းသိမ်းမှု ပြုလုပ်
