တရုတ်သမ္မတ ရှီကျင်ပင်း၏ ပြင်သစ်ခရီးစဉ်အတွင်း မတ် ၂၅ ရက်တွင် ဥရောပ လေယာဉ်ထုတ်လုပ်သည့် ကုမ္ပဏီ Airbus နှင့် တရုတ်နိုင်ငံအကြား ဒေါ်လာဘီလျံနှင့်ချီ တန်ဖိုးရှိသော လေယာဉ်များ ဝယ်ယူရန် သဘောတူညီမှု ရရှိခဲ့သည်ဟု သမ္မတရုံးမှ တာဝန်ရှိသူ တစ်ဦးက ပြောကြားခဲ့သည်။
ရှီ၏ အလုပ်သဘော ခရီးစဉ်သည် တရုတ်နှင့် ပြင်သစ်အကြား ဆက်ဆံရေးခိုင်မာမှုနှင့် ယုံကြည်အားထားမှု အတွက် ထူးခြားသည့် လက္ခဏာတစ်ခုဟု ပြင်သစ်သမ္မတ အီမန်နျူရယ်မက်ခရွန်က ပြောကြားခဲ့သည်။
ပြင်သစ်နှင့် တရုတ်နိုင်ငံတို့သည် တိကျပြတ်သားပြီး ရည်မှန်းချက်ကြီးသော စည်းမျဉ်းများကို အခြေခံပြီး ခိုင်မာသည် ဥရောပ-တရုတ် စီးပွားရေးမိတ်ဖက် ထူထောင်ရန် ဆန္ဒရှိသည်ဟု သမ္မတနန်းတော်တွင် မက်ခရွန်က ပြောကြားခဲ့သည်။
အမေရိကန်နှင့် တရုတ်၊ အမေရိကန်နှင့် ဥရောပသမဂ္ဂအကြား ကုန်သွယ်ရေး တင်းမာမှုများ ဖြစ်နေစဉ် ဥရောပ ခေါင်းဆောင်များက တရုတ်နှင့် ကုန်သွယ်ရေး မြှင့်တင်လိုကြသည်။
Airbus နှင့် သဘောတူစာချုပ်တွင် တရုတ်အတွက် လေယာဉ်အစင်း ၃၀၀ ကျော် ရောင်းချပေးရန် သဘောတူညီမှုလည်း ပါဝင်သည်။ China Aviation Supplies Holding ကုမ္ပဏီသည် Airbus A320 လေယာဉ် ၂၉၀ စင်းနှင့် Airbus A350 ၁၀ စင်း ဝယ်ယူရန် မှာကြားခဲ့သည်ဟု ပြင်သစ်သမ္မတရုံးက ထုတ်ပြန်သည်။ တန်ဖိုးကို အတိအကျ မဖော်ပြခဲ့သော်လည်း ဒေါ်လာ ၃၄ ဘီလျံခန့် ရှိသည်ဟု ခန့်မှန်းထားသည်။
“တရုတ်မှာ ကျွန်တော်တို့ရဲ့ခြေရာ ကျယ်ပြန့်လာမှုဟာ တရုတ်စျေးကွက်ကို စိတ်ချယုံကြည်မှုနဲ့ တရုတ်နဲ့ ကျွန်တော်တို့ရဲ့ စီးပွားဖက်တွေအပေါ် ကာလကြာ အာမခံချက်ပေးမှုကို ထင်ရှားစေတယ်” ဟု Airbus Commercial Aircraft ၏ ဥက္ကဋ္ဌ Guillaume Faury က ပြောကြားခဲ့သည်။
မတ် ၂၅ ရက်တွင် နှစ်ဖက်သဘောတူညီချက်များအပြင် ပြန်လည်ဖွံ့ဖြိုးမြဲစွမ်းအင်နှင့် အစားအစာလုပ်ငန်း အပါအဝင် အခြားအရေးပါသည့် စီးပွားရေး သဘောတူညီချက်များကိုလည်း လက်မှတ်ရေးထိုး ခဲ့ကြသည်။
ပြင်သစ် ကြက်သားများကို တရုတ်သို့ တင်ပို့ရေးကို ခွင့်ပြုမည့် ညှိနှိုင်းချက် မှတ်တမ်းတစ်ခုကိုလည်း နှစ်နိုင်ငံခေါင်းဆောင်များက သဘောတူခဲ့ကြသည်။
၂၀၁၈ ခုနှစ် ဇန်နဝါရီတွင် မက်ခရွန်က တရုတ်နိုင်ငံသို့ အလုပ်သဘော သွားရောက်ခဲ့ပြီးနောက် ပြင်သစ် အမဲသား ထုတ်ကုန်များအတွက် တရုတ်က စျေးကွက်ဖွင့်လှစ် ပေးခဲ့သည်။ ပြင်သစ်စွမ်းအင်ကုမ္ပဏီ EDF နှင့် တရုတ်စွမ်းအင် ရင်းနှီးမြှုပ်နှံမှု ကော်ပိုရေးရှင်းတို့သည် တရုတ်ရေပိုင်နက်တွင် ကမ်းလွန်လေအားလျှပ်စစ် ထုတ်လုပ်သည့် နေရာနှစ်ခု ထောက်ပံ့ပေးရန် ဒေါ်လာ ၁.၁ ဘီလျံ တန်ဖိုးရှိ သဘောတူစာချုပ် ချုပ်ဆိုခဲ့သည်။
မတ် ၂၅ ရက် ညပိုင်းတွင် မက်ခရွန်က တရုတ်သမ္မတရှီကို Elysee Palace တွင် ညစာတည်ခင်း ဧည့်ခံခဲ့သည်။ ညစာစားပွဲသို့ ပြင်သစ်သရုပ်ဆောင် Alain Delon၊ မီချယ်လင်း ဆုတံဆိပ်ရ စားဖိုမှူး Alain Ducasse၊ ပြင်သစ်-တရုတ် ပန်းချီဆရာ Yan Pie Ming နှင့် တရုတ်သရုပ်ဆောင် ဂေါင်းလီတို့ အပါအဝင် ဧည့်သည်များ တက်ရောက်ခဲ့ကြသည်။
Ref : AP
-
မြန်မာ-တရုတ်နယ်စပ် စီးပွားရေး ပူးပေါင်းဆောင်ရွက်မှုဇုန် တည်ထောင်ရေးတွင် မြန်မာနိုင်ငံ၏ နယ်နိမိတ်ပိုင်နက် နယ်မြေဆုံးရှုံးမှု မရှိစေရေး၊ နှစ်နိုင်ငံအကြား နယ်နိမိတ်သတ်မှတ်ချက်ကို အလေးထားဆောင်ရွက်ရန် စီးပွား/ကူးသန်းဝန်ကြီး ပြောကြား
-
မြန်မာနိုင်ငံဆိုင်ရာ ဂျပန်သံအမတ်ကြီးနှင့် ပြည်ထောင်စုဝန်ကြီးတွေ့ဆုံ၍ ဂျပန်နိုင်ငံကူညီမှုဖြင့် ဆောင်ရွက်နေသည့် ရန်ကုန်မြို့ပတ်ရထားလမ်းနှင့် ရန်ကုန် -မန္တလေး ရထားလမ်း အဆင့်မြှင့်တင်ရေးစီမံကိန်းများ ဆွေးနွေး
-
တရုတ်-မြန်မာ နှစ်နိုင်ငံအကြား တိုက်ရိုက်လေကြောင်းခရီးစဉ်ပျံသန်းသည့် ၁၃ ခုမြောက် တရုတ်လေကြောင်းလိုင်းအဖြစ် Qingdao လေကြောင်းလိုင်း နင်းပေါ်-ရန်ကုန် တိုက်ရိုက်လေကြောင်းခရီးစဉ် စတင်ပျံသန်း
-
အမေရိကန်-တရုတ် ကုန်သွယ်ရေးစစ်ပွဲကြောင့် မြန်မာနိုင်ငံသို့ပြောင်းရွှေ့လုပ်ကိုင်လိုသည့် နိုင်ငံတကာလုပ်ငန်းရှင်များရှိသော်လည်း သုံးလအတွင်း မြေနေရာရရှိရေးဆောင်ရွက်မပေးနိုင်သဖြင့် အာဆီယံနိုင်ငံများသို့ သွားရောက်လုပ်ကိုင်နေကြောင်း ဝန်ကြီးနော်ပန်းသဥ္ဇာမျိုး ပြောက
-
၂၀၂၀ ပြည့်နှစ် မော်တော်ယာဉ်တင်သွင်းမှုမူဝါဒဆိုင်ရာ Model Year သတ်မှတ်ချက် ထွက်ရှိလာပြီး မော်တော်ယာဉ်တင်သွင်းမှု အစီအစဉ်အားလုံးတွင် ယခင်နှစ်ထက် ထုတ်လုပ်သည့်ခုနှစ် တစ်နှစ်စီထပ်တိုး
