COVID-19 ကပ်ရောဂါကူးစက်ပြန့်ပွားမှုနှင့် Lockdown ချမှုများကြောင့် ရေနံစျေးထိုးကျနေမှုကို ကယ်တင်ရန်အတွက် ရေနံထုတ်လုပ်သည့်နိုင်ငံများအဖွဲ့ (OPEC) နှင့် ရေနံအဓိကထုတ်လုပ်သည့် အခြားသော မဟာမိတ်နိုင်ငံများက ရေနံထုတ်လုပ်မှု ပမာဏ စံချိန်တင်လျှော့ချခြင်းကို ဇူလိုင်လကုန်အထိ တိုးမြှင့်လုပ်ဆောင်ရန် ဇွန် ၆ ရက်တွင် သဘောတူခဲ့ကြသည်။
အဖွဲ့ဝင် ၁၃ နိုင်ငံ ပါဝင်သော OPEC နှင့် ရုရှားအပါအဝင် အခြားသော ရေနံထုတ်လုပ်သည့် မဟာမိတ်နိုင်ငံများ (OPEC+ ဟု အသိများ) သည် ကိုရိုနာဗိုင်းရပ်စ်ကြောင့် ပြိုလဲခဲ့သော ရေနံစျေးကို ပြန်လည် ဦးမော့လာစေရန်အတွက် ရေနံထုတ်လုပ်မှုကို မေလနှင့် ဇွန်လတွင် လျှော့ချရန် ပြီးခဲ့သည့် ဧပြီ၌ ကနဦး သဘောတူထားခဲ့ပြီး ယင်းသို့ လျှော့ချခြင်းကို ဇူလိုင်လအကုန်အထိ တိုးမြှင့်လုပ်ဆောင်ရန် ဇွန် ၆ ရက်တွင် ကျင်းပသော OPEC+ အဖွဲ့ဝင်နိုင်ငံဝန်ကြီးများ၏ ဗီဒီယိုဖြင့် ဆက်သွယ်ဆွေးနွေးမှုအတွင်း သဘောတူခဲ့ကြခြင်းဖြစ်သည်။
ဧပြီသဘောတူညီချက်ပါ သတ်မှတ်ချက်များအရ OPEC+ အဖွဲ့သည် မေ ၁ ရက်မှ ဇွန်လကုန်အထိ တစ်နေ့လျှင် ရေနံစည် ၉.၇ သန်း လျှော့ချထုတ်လုပ်ရန် ကတိပြုခဲ့ကြသည်။ ထိုသို့ ရေနံစည် လျှော့ချထုတ်လုပ်မှုများကို ဇူလိုင်လမှစတင်၍ တဖြည်းဖြည်းချင်း ဖြေလျှော့ပေးနိုင်ဖွယ်ရှိပြီး ဒီဇင်ဘာလမတိုင်မီအထိ တစ်နေ့လျှင် ရေနံစည် ၇.၇ သန်း လျှော့ချထုတ်လုပ်နိုင်ဖွယ်ရှိသည်။
OPEC အဖွဲ့သည် ဇူလိုင်အတွက် ရေနံထုတ်လုပ်မှုကို တစ်နေ့လျှင် ရေနံစည် ၉.၆ သန်းလျှော့ချထုတ်လုပ်မည်ဟု သဘောတူခဲ့ကြောင်း၊ ယင်းပမာဏသည် တစ်နေ့လျှင် ရေနံစည် ၉.၇ သန်းလျှော့ချခဲ့သော မေ၊ ဇွန်လနှင့်ယှဉ်ပါက အနည်းငယ် လျော့နည်း သွားခြင်းဖြစ်ကြောင်း၊ သဘောတူညီချက်ကို ချင့်ချိန်ဆုံးဖြတ်ရန်အတွက် ရေနံအဓိက ထုတ်လုပ်သည့်နိုင်ငံများမှ ရေနံဝန်ကြီးဌာန ဝန်ကြီးများနှင့် လစဉ်ဆွေးနွေးမှုများ ပြုလုပ်သွားမည်ဖြစ်ကြောင်း OPEC အဖွဲ့၏ အလှည့်ကျဥက္ကဋ္ဌတာဝန်ကို ထမ်းဆောင်နေသော အယ်ဂျီးရီးယား ရေနံဝန်ကြီး မိုဟာမက်အာကက်ဘ်က ပြောကြားခဲ့သည်။
အခက်အခဲများ ကြုံတွေ့နေရသော်လည်း ရေနံထုတ်လုပ်မှုလျှော့ချခြင်းသည် ရေနံစျေးမြင့်တက်စေရန် အထောက်အကူပြုခဲ့ကာ ဧပြီလတွင် တစ်စည်လျှင် ဒေါ်လာ ၂၀ အောက်သာ ရှိခဲ့သော ရေနံစိမ်းစျေးနှုန်းသည် သုံးလအတွင်း စျေးနှုန်းမြင့်တက်လာမှုအဖြစ် ဇွန် ၅ ရက်တွင် ရေနံစိမ်းတစ်စည်လျှင် ၄၂ ဒေါ်လာအထက်သို့ ရောက်ရှိခဲ့သည်။
ဇွန် ၈ ရက်မှစ၍ ရေနံစျေးနှုန်းများ ခိုင်မာလာမည်ဟု ခန့်မှန်းရကြောင်း Rystad Energy မှ ဂျော်နာတွန်ဟာဂျင်က ဆိုသည်။
ဆော်ဒီအာရေဗျနှင့်ရုရှားသည် ၎င်းတို့၏ ဘတ်ဂျက်လိုအပ်မှုကို ဖြည့်ဆည်းရန်အတွက် ရေနံစျေး မြင့်တက်လာစေရန် ဟန်ချက်ညီညီ ဆောင်ရွက်ရလိမ့်မည်ဖြစ်သည်။
မေလအတွင်း အီရတ်သည် တစ်နေ့လျှင် ရေနံစည် ၅၂၀,၀၀၀၊ နိုင်ဂျီးရီးယားသည် တစ်နေ့လျှင် ရေနံစည် ၁၂၀,၀၀၀၊ ကာဇက်စတန်သည် တစ်နေ့လျှင် ရေနံစည် ၁၈၀,၀၀၀၊ ရုရှားသည် တစ်နေ့လျှင် ရေနံစည် ၁၀၀,၀၀၀ ထုတ်လုပ်ခဲ့ကြောင်း OPEC+ ၏ ကိန်းဂဏန်းအချက်အလက်တွင် ဖော်ပြထားသည်။
OPEC နှင့် OPEC+ သည် စီစဉ်ထားသော ဆွေးနွေးပွဲများကို နိုဝင်ဘာ ၃၀ ရက်နှင့် ဒီဇင်ဘာ ၁ ရက်တို့တွင် ကျင်းပလိမ့်မည် ဖြစ်သည်။
-
ရွှေတိဂုံ စေတီတော်မြတ်ကြီးအား လုံးတော်ပြည့် ရွှေစင်ရွှေပြားသင်္ကန်းတော်များ ကပ်လှူပူဇော်ရန် ရွှေစင်ရွှေပြား ၄၇၃၉ ချပ် အလှူခံရရှိ
-
ပိုးမွှားကင်းရှင်းကြောင်း သတ်မှတ်ချက်များနှင့် ကိုက်ညီသဖြင့် မြန်မာနာနတ်သီး တရုတ်သို့ တင်သွင်းခွင့်ပြုမည်
-
မူဆယ်မြို့ရှိ ဆင်ဖြူဂိတ်တွင် မြန်မာဘက်အခြမ်းသို့ ကုန်ပစ္စည်းများတင်သွင်းခွင့် တရုတ်ဘက်က ခွင့်ပြု
-
မြန်မာနိုင်ငံတွင် ပဋိပက္ခကြောင့် ထိခိုက်ခံစားနေရသည့် ကလေးငယ်များအားပံ့ပိုးကူညီရန် ဒေါ်လာ ၂၀၈ သန်း အရေးပေါ်လိုအပ်နေကြောင်း UNICEF Myanmar ထုတ်ပြန်
-
သန်လျင်မြို့နယ်၊ ကုလားဝဲကျေးရွာ၊ ကုလားဝဲတံတားအဆင်းတွင် ဆီဘောက်ဆာယာဉ် မီးလောင်မှု ဖြစ်ပွား
