နိုဝင်ဘာ ၂၂ ရက်က အမေရိကန်စစ် စစ်သင်္ဘောတစ်စီးသည် ထိုင်ဝမ်နှင့် တရုတ်နိုင်ငံကို ပိုင်းခြားထားသော ရေလက်ကြားကို ဖြတ်သန်းခုတ်မောင်းခဲ့သည်ဟု အမေရိကန်ရေတပ်က ထုတ်ဖော်ပြောကြားခဲ့ပြီး ပြိုင်ဘက် စူပါပါ၀ါနှစ်နိုင်ငံမှ ခေါင်းဆောင်နှစ်ဦး အွန်လိုင်းအစည်းအဝေး ပြုလုပ်ခဲ့ပြီးနောက် ထိုင်ဝမ်ရေလက်ကြားကို အမေရိကန်စစ်သင်္ဘော ပထမဆုံးဖြတ်သန်းမှု ဖြစ်သည်။
Arleigh Burke - class ပဲ့ထိန်းဒုံးကျည် တပ်ဆင်ထားသောဖျက်သင်္ဘော USS Milius ထိုင်ဝမ်ရေလက်ကြားကို ဖြတ်သန်းခြင်းသည် လုပ်ရိုးလုပ်စဉ် ဖြစ်သန်းမှုဖြစ်သည်ဟု အမှတ်ခုနစ် အမေရိကန်ရေတပ်က ထုတ်ပြန်ခဲ့သည်။
ယခုနှစ်၏ ၁၁ ကြိမ်မြောက် လွတ်လပ်သော ရေကြောင်းသွားလာမှုဟု ကြေညာခဲ့သော ပင်လယ်ခရီးရှည်သည် လွတ်လပ်ပွင့်လင်းသော အင်ဒို-ပစိဖိတ်အတွက် အမေရိကန်၏ လုပ်ဆောင်ချက်ကို ထင်ရှားစေသည်ဟု အမှတ်ခုနစ်ရေတပ်၏ ထုတ်ပြန်ချက်တွင် ဖော်ပြထားသည်။
ထိုင်ဝမ်လွတ်လပ်ရေးကို အားပေးအားမြှောက်လုပ်ခြင်းသည် အန္တရာယ်နှင့် ကစားခြင်းဖြစ်လိမ့်မည်ဟု အွန်လိုင်းထိပ်သီး အစည်းအဝေးတွင် ရှီကျင်းပင်က ဂျိုးဘိုင်ဒင်ကို သတိပေးခဲ့သည်ဟု တရုတ်နိုင်ငံပိုင်မီဒီယာက ဖော်ပြခဲ့သည်။
အမေရိကန်စစ်သင်္ဘောများသည် ထိုင်ဝမ်ရေလက်ကြားတွင် စစ်ရေးလေ့ကျင့်မှုများကို အခါအားလျော်စွာ လုပ်ဆောင်လျက်ရှိရာ ထိုင်ဝမ်ကိုလည်းကောင်း၊ ထိုင်ဝမ်အနီးဝန်းကျင်ရှိ ရေပြင်ကိုလည်းကောင်း မိမိပိုင်နက်ဖြစ်သည်ဟု ပြောကြားထားသော တရုတ်၏ဒေါသတကြီးတုံ့ပြန်မှုများကို မကြာခဏ ဖြစ်ပေါ်စေခဲ့သည်။
အမေရိကန်နှင့် အခြားသောနိုင်ငံအများစုက ထိုင်ဝမ်ရေလက်ကြားကို အားလုံးအတွက် ပွင့်လင်းသော အပြည်ပြည်ဆိုင်ရာ ရေပြင်အဖြစ် ရှုမြင်ထားကြသည်။
တရုတ်က ထိုင်ဝမ်ကို စစ်ရေးခြိမ်းခြောက်မှုများ တိုးမြှင့်လုပ်ဆောင်လျက်ရှိပြီး အငြင်းပွားတောင်တရုတ်ပင်လယ်ကို ထိန်းချုပ်မှုများ ခိုင်မာအောင်လုပ်ဆောင်လျက် ရှိသည့်အနေအထားတွင် အရေအတွက် ပိုမိုများပြားလာသော အမေရိကန်မဟာမိတ်နိုင်ငံများသည် ထိုင်ဝမ်ရေလက်ကြားကို ဖြတ်သန်းခဲ့ကြသည်။
ဗြိတိန်၊ ကနေဒါ၊ ပြင်သစ်နှင့် သြစတြေးလျတို့က စစ်သင်္ဘောများသည် မကြာသေးခင်နှစ်များတွင် ထိုင်ဝမ်ရေလက်ကြားကို ဖြတ်သန်းခဲ့ကြရာ တရုတ်ထံမှ ကန့်ကွက်မှုများကို ဖြစ်ပေါ်စေခဲ့သည်။
စင်ကာပူနိုင်ငံရှိ ရာဇာရတ်နမ် အပြည်ပြည်ဆိုင်ရာ လေ့လာရေးကျောင်းမှ သုတေသီ ကောလင်းခိုးသည် ထိုင်ဝမ်ရေလက်ကြားကို ဖြတ်သန်းမည်ဟု ကြေညာခဲ့သော အမေရိကန်စစ်သင်္ဘောများ ခုတ်မောင်းမှုနှင့် သက်ဆိုင်သော အချက်အလက်များကို ထိန်းသိမ်းထားသူဖြစ်သည်။
၂၀၁၉ ခုနှစ်တွင် ထိုင်ဝမ်ရေလက်ကြားသို့ အမေရိကန်စစ်သင်္ဘောများ ဖြတ်သန်းခုတ်မောင်းမှုသည် ကိုးကြိမ်ရှိခဲ့သည်ဟု ဆိုသည်။ ၂၀၂၀ ခုနှစ်တွင် ယင်းရေလက်ကြားသို့ ဖြတ်သန်းမှု ၁၅ ကြိမ်ရှိခဲ့သည်ဟု ကောလင်းခိုးက ပြောကြားသည်။ ၂၀၂၁ ခုနှစ်တွင်လည်း လက်ရှိအချိန်ထိ အမေရိကန်စစ်သင်္ဘောများ ထိုင်ဝမ်ရေလက်ကြားသို့ ဖြတ်သန်းခုတ်မောင်းမှု ၁၁ ကြိမ်ရှိထားသည်ဟု ဆိုသည်။
ယခုဖြတ်သန်းခုတ်မောင်းခဲ့သော USS Milius စစ်သင်္ဘောသည် ၂၀၂၁ ခုနှစ်အတွင်း ထိုင်ဝမ်ရေလက်ကြားကို ၁၁ ကြိမ်ဖြတ်သန်းခဲ့ပြီး ဖြစ်သည်ဟု ၎င်းကထုတ်ဖော် ပြောကြားခဲ့သည်။
-
လက်ဘနွန်တောင်ပိုင်းရှိကုလ ငြိမ်းချမ်းရေးတပ်ဖွဲ့များကို ရုတ်သိမ်းပေးရန် နေတန်ယာဟုတောင်းဆို
-
မော်လမြိုင်မြို့နှင့် သာစည်မြို့နယ်တို့တွင် စိတ် ကြွဆေးပြား(၈)သောင်းပြားဖမ်းမိခဲ့
-
ပြည်ပသို့ ပြောင်း တင်ပို့မှု သတ်မှတ်လျာထားချက်ထက် ကျော်လွန်တင်ပို့နိုင်ခဲ့၊ နိုင်ငံခြားဝင်ငွေ တတိယအများဆုံးရရှိသည့် လယ်ယာထွက်သီးနှံဖြစ်
-
ပဲ့ထိန်းဒုံးကျည်တပ် အမေရိကန်စစ်သင်္ဘော USS Milius ထိုင်ဝမ်ရေလက်ကြားကို ဖြတ်သန်း
-
ငြိမ်းချမ်းရေး သဘောတူညီမှုရရှိခဲ့သည့် နှစ်ပတ်လည်နေ့ အထိမ်းအမှတ်အတွက် ကုလသမဂ္ဂ အတွင်းရေးမှူးချုပ် ကိုလံဘီယာသို့ သွားရောက်