မလေးရှားတွင် မြန်မာနိုင်ငံသား ဖခင်က ကလေးသုံးယောက်ကို တံတားပေါ်မှ ပစ်ချပြီး ကိုယ့်ကိုကိုယ် အဆုံးစီရင်ခဲ့သည့်ဖြစ်စဉ်မှ သေဆုံးသွားသည့် ကလေးငယ်များနှင့် ဖခင်၏ နာရေးပြုလုပ်ခဲ့ကြောင်း မြန်မာလူမှုကူညီရေးအသင်း (မလေးရှား) မှ သိရသည်။
“ကျန်ရစ်သောခန္ဓာကိုယ်ကို ကြာသပတေးနေ့ သြဂုတ် ၄ ရက်တွင် ဒေသဆိုင်ရာ ချင်းအမျိုးသားများ ကွန်မြူနတီအဖွဲ့အစည်းစုံ မိသားစုများနှင့် ပူးပေါင်းကာ နေ့လည် (၁း၃၀)နာရီ၌ စလန်းကောပြည်နယ် (စမုံ့ညှင်းမြို့) ခရစ်ယာန်သချႋုင်းတွင်ဆုတောင်းပွဲကျင်းပကာ မြေသို့အပ်နှံသဂြိုလ်ပြီးစီးခဲ့ပါသည်” ဟု မြန်မာလူမှုကူညီရေးအသင်းက ထုတ်ပြန်သည်။
သြဂုတ် ၂ ရက် နံနက်က MRR2 အဝေးပြေးလမ်းမကြီး၏ တံတားပေါ်မှ ကလေးသုံးဦးကို အရင်ဆုံး ပစ်ချခဲ့ကြောင်း၊ ယင်းသို့ပစ်ချပြီးနောက် ဖခင်ကိုယ်တိုင် တံတားပေါ်မှ ခုန်ချကာ သေကြောင်းကြံစည်ခဲ့ကြောင်း၊ ယင်းသို့ သေကြောင်းကြံစည်မှုကြောင့် ကလေးနှစ်ဦးနှင့် ဖခင်မှာ သေဆုံးခဲ့ပြီး ငါးနှစ်အရွယ် ကလေးတစ်ဦးမှာ ဒဏ်ရာအပြင်းအထန်ရရှိထားကြောင်း မလေးရှားအခြေစိုက် The Star သတင်းဌာနက ဖော်ပြထားသည်။
သေကြောင်းကြံစည်မှုကြောင့် ၃၈ နှစ်အရွယ်အမျိုးသားနှင့် အခြားကလေးနှစ်ဦးမှာ အခင်းဖြစ်နေရာတွင် သေဆုံးပြီး အခြားကလေးတစ်ဦးမှာ ဒဏ်ရာအပြင်းအထန်ရရှိကာ ဆက်လက်ကုသရန် ဆလာယန်းဆေးရုံသို့ ပို့ဆောင်ထားကြောင်း Sentul ရဲချုပ် Beh Eng Lai က ပြောကြားသည်ဟု အဆိုပါသတင်းတွင် ဖော်ပြထားသည်။
မျက်မြင်သက်သေများ၏ အဆိုအရ အခင်းမဖြစ်ပွားမီ နံနက် ၅ နာရီ ၅၀ မိနစ်တွင် ကလေးငယ်များကို လက်ဆွဲကာ လမ်းလျှောက်လာသည့် မြန်မာနိုင်ငံသားတစ်ဦးကို တွေ့ရှိခဲ့ကြောင်း မျက်မြင်သက်သေများ၏ ပြောကြားချက်ကို ကိုးကားပြီး သတင်းတွင် ဖော်ပြထားသည်။ အဆိုပါအမှုကို ရာဇသတ်ကြီးပုဒ်မ ၃၀၂ အရ အမှုဖွင့်စစ်ဆေးနေပြီး ပြည်သူများအနေဖြင့် သတင်းအချက်အလက်များ ပေးဆောင်ရန် တောင်းဆိုထားကြောင်း ရဲချုပ်က ပြောကြားသည်။
သေဆုံးသွားသူများမှာ မြန်မာနိုင်ငံသား ချင်းလူမျိုးမိသားစုဖြစ်ကာ ဖခင်ဖြစ်သူမှာ ဦး Cholei၊ ရှစ်နှစ်အရွယ် သမီး Vadetisoh၊ ခြောက်နှစ်အရွယ် သား Vabiechose တို့ဖြစ်ကြောင်း၊ မိသားစုဝင်များအားလုံး ဘုရားသခင်၏စောင့်ရှောက်မှုကိုခံယူရရှိပြီး ကောင်းကင်ဘုံသို့ရောက်ရှိပါစေကြောင်း မြန်မာလူမှုကူညီရေးအသင်း (မလေးရှား)က သတင်းထုတ်ပြန်သည်။
-
မြဝတီမြို့တွင် နိုင်ငံတကာ အဆင့်မီ အဝေးပြေး ယာဉ်ရပ်နားစခန်း စတင်တည်ဆောက်နေ
-
ဧရာဝတီတိုင်းအတွင်းရှိ ပြောင်းစိုက်ခင်းများတွင် ငမြှောင်တောင်ပိုး မျိုးစိတ်အသစ်ဖြစ်သည့် Fall Armyworm ပိုး ကာကွယ်နှိမ်နင်းရေးအတွက် ပြည်ထောင်စုမှ ရန်ပုံငွေ ကျပ်သိန်းငါးရာ ထောက်ပံ့ထားကြောင်း သိရ
-
ပလက်ဝမြို့နယ် ရီးမဝ ကျေးရွာအနီး ကုလားတန်မြစ်အတွင်း စက်လှေတစ်စင်း ပစ်ခတ်ခံရကာ အသက် ၁၁ နှစ်အရွယ် ကလေးနှစ်ဦး သေဆုံးပြီး စက်လှေမောင်းသူနှင့် ကလေးနှစ်ဦး ဒဏ်ရာရရှိ
-
မလေးရှားတွင် မြန်မာနိုင်ငံသား ဖခင်က ကလေးသုံးယောက်ကို တံတားပေါ်မှ ပစ်ချပြီး ကိုယ့်ကိုကိုယ် အဆုံးစီရင်ခဲ့သည့်ဖြစ်စဉ်မှ သေဆုံးသွားသည့် ကလေးငယ်များနှင့် ဖခင်၏ နာရေးပြုလုပ်
-
နစက နှင့် ငြိမ်းချမ်းရေး ဆွေးနွေးရန် SSPP/SSA အဖွဲ့ နေပြည်တော်သို့ ရောက်ရှိနေ
