အရှုံးမရှိဘဲ အမြဲတမ်းမြတ်နေသည့် ပြည်တွင်းမှ ပုဂ္ဂလိကဘဏ်များထံ ဒေါ်လာအပ်နှံရာတွင် ရာခိုင်နှုန်းဖြင့် ဖြတ်တောက်နေမှုမှာ ငွေအပ်သူများအပေါ် မညှာမတာ လုပ်ရာကျနေသဖြင့် နိုင်ငံပိုင်ဘဏ်သုံးခုတွင် ဒေါ်လာ လာရောက်အပ်နှံသူများထံမှ ပုဂ္ဂလိက ဘဏ်များကဲ့သို့ ရာခိုင်နှုန်းဖြင့် ဖြတ်တောက်ရယူမှုမပြုရန် အဆိုပြုထားကြောင်း စီမံကိန်းနှင့် ဘဏ္ဍာရေး ဝန်ကြီးဌာန ပြည်ထောင်စုဝန်ကြီး ဦးစိုးဝင်းက ဇန်နဝါရီ ၁၂ ရက်တွင် ပြောကြားသည်။
ရန်ကုန်မြို့ UMFCCI ၌ ပြုလုပ်သည့် ပုံမှန်တွေ့ဆုံပွဲတွင် ပြည်ထောင်စုဝန်ကြီးက ထိုသို့ထည့်သွင်း ပြောကြားခြင်း ဖြစ်သည်။
“ကျွန်တော်တို့နိုင်ငံက ဘဏ်တွေက အမြဲတမ်းမြတ်နေတဲ့ ဘဏ်တွေပါ။ ဒါပေမဲ့ သူတို့ဘဏ်တွေကို ကျွန်တော်တို့ သွားတဲ့အခါကျရင် နိုင်ငံခြားငွေ ဒေါ်လာသွင်းတဲ့အခါကျရင် သူတို့က Point 03 Percent ဖြတ်ပါတယ်။ ကိုယ့်ဘက်ကလည်း ငွေသွင်းရသေးတယ်။ ကိုယ်ကလည်း ပိုက်ဆံပေးရသေးတယ်ဆိုတော့ ဒီဟာက သိပ်ပြီးတော့ ငွေအပ်တဲ့သူတွေအပေါ်မှာ မညှာမတာလုပ်ရာ ကျပါတယ်” ဟု ဦးစိုးဝင်းက ပြောကြားသည်။
ပြည်သူများနှင့် ဘဏ်အသုံးပြုသူများထံမှ နိုင်ငံခြားငွေကို ဘဏ်များသို့ လာ၍အပ်နှံချိန်တွင် ပုဂ္ဂလိက ဘဏ်များကဲ့သို့ ရာခိုင်နှုန်းဖြင့် ငွေဖြတ်တောက်မှု မပြုရန် အဆိုပြုထားသည့် ဘဏ်သုံးခုမှာ မြန်မာ့နိုင်ငံခြား ကုန်သွယ်မှုဘဏ်၊ မြန်မာ့ရင်းနှီးမြှုပ်နှံမှုနှင့် ကူးသန်းရောင်းဝယ်ရေးဘဏ်နှင့် မြန်မာ့စီးပွားရေးဘဏ်တို့ ဖြစ်ကြောင်း ဦးစိုးဝင်းက ဆက်လက်ပြောကြားသည်။
“ကျွန်တော်တို့အနေနဲ့ ကိုင်တွယ်လုပ်ကိုင်ပေးရတဲ့ ဘဏ်ကြီးသုံးခု ရှိပါတယ်။ MFTB ရယ် MEB ရယ် MICB ရယ်။ သူတို့ဆီကနေပြီးတော့ သူတို့ကိုလာအပ်တဲ့ ဒေါ်လာတွေအပေါ်မှာ Free၊ မယူဖို့ ဆိုပြီးတော့ အဆိုပြု ထားပါတယ်။ ဒီလိုအဆိုပြုလို့ရှိရင် ဘဏ်နဲ့ ဘဏ်အသုံးပြုသူတွေကြားမှာ ဆက်ဆံရေး အလွန်ကောင်းလာမယ်လို့ မျှော်လင့်ပါတယ်။ ဒီအတွက်လည်း အစီအစဉ်တွေချပြီး ဆောင်ရွက်နေပါတယ်” ဟု ဦးစိုးဝင်းက ပြောကြားသည်။
ထို့ပြင် ဘဏ်များသို့ သွားရောက်ရာ၌ ပုံစံများ ရောင်းချနေပြီး ထိုသို့ပုံစံရောင်းကာ ရန်ပုံငွေရရေး ရောင်းချနေမှုများ ရှိနေကာ ထိုသို့ရောင်းချနေမှုများကြောင့် Corruption ဝင်လာမည်ကို စိုးရိမ်မှုများ ဖြစ်နေရကြောင်းနှင့် ဘဏ်များအနေဖြင့် အရှုံးမရှိဘဲ အမြတ်ချည်းသာ ရနေသဖြင့် အဆိုပါ စရိတ်များကို Customer များက ကျခံနေရသည့်အစား ဘဏ်များကသာ ကျခံစေရန် ဆန္ဒရှိနေသည်ဟု ဦးစိုးဝင်းက ပြောကြားသည်။
ထို့ကြောင့် ကနဦးအနေဖြင့် နိုင်ငံပိုင်ဘဏ်များတွင် စက္ကူကြေး၊ ပုံစံကြေးများရယူမှု မရှိဘဲ ဘဏ်က အမှန်တကယ် လိုအပ်သည့် တရားဝင်ယူရမည့် အခများကိုသာ ကောက်ခံရန် စီစဉ်ထားကြောင်း ဦးစိုးဝင်းက ဆက်လက်ပြောကြားသည်။
-
ပြည်ပရောက်အလုပ်သမားများ၏လွှဲပို့ငွေ မပြနိုင်သည့် အေဂျင်စီ ၈၁ခု ကို အလုပ်ခေါ်စာအသစ် တင်ခွင့်ခေတ္တဆိုင်းငံ့
-
“ဝ”ဒေသ ဟိုပန်ခရိုင်အတွင်း ဖျော်ဖြေရေးလုပ်ငန်း၊ အနှိပ်ခန်း အပါအဝင် လုပ်ငန်း(၈)ခုတွင် လုပ်ကိုင်သူများအား ကူးစက် ရောဂါပိုးစစ်ဆေးမည်
-
ဒဏ်ရာပြဿနာကြောင့် အော်ဒီဂွါကို အချိန်တစ်ခုကြာလက်လွှတ်ရမည်ဟု အာတီတာ ဝန်ခံခဲ့ပြီး ဒီဘရိုင်းနားလည်း အာဆင်နယ်နှင့်ပွဲတွင် ပါဝင်နိုင်ရန် မသေချာ
-
နေမာ၏သတိပေးချက်သတင်းများ ထွက်ပေါ်နေမှုကို အမ်ဘာပေနှင့် ဆက်ဆံရေးကောင်းမွန်ကြောင်း ပြောကြားပြီး ရိုဒရီဂို တုံ့ပြန်
-
အယ်လ်ဗာရက်ဇ်ကို အချိန်ပေးရမည်ဟု ဆီမြွန်နီ ဆို