မြဝတီ-ကော့ကရိတ် ဒေါနတောင်ကျော် အာရှလမ်းသစ် မိုင်တိုင် ၁၅၄-၁၅၅ ကီလိုမီတာကြား နတ်စင်ကွေ့အနီးတွင် ကျောက်ပြားများ တင်ဆောင်လာသည့် ကုန်တင်ယာဉ်တစ်စီး ဇန်နဝါရီ ၈ ရက် ညက အရှိန်မထိန်းနိုင်ဘဲ တိမ်းမှောက်သွားခဲ့ရာ ယာဉ်နောက်လိုက်တစ်ဦး သေဆုံးသွားခဲ့ကြောင်း သိရသည်။
ယာဉ်တိမ်းမှောက်မှု ဖြစ်ပွားကြောင်း သတင်းအရ ကော့ကရိတ်ရဲစခန်းမှ ရဲတပ်ဖွဲ့ဝင်များနှင့် ယာဉ်ထိန်းရဲတပ်စု (၇၁) မှ ရဲအုပ် သန်းနိုင်ရွှေနှင့် ရဲတပ်ဖွဲ့ဝင်များ သွားရောက် စစ်ဆေးခဲ့ကြကြောင်း သိရသည်။
အခင်းဖြစ်စဉ်နှင့်ပတ်သက်၍ သက် ဆိုင်ရာရဲတပ်ဖွဲ့မှစစ်ဆေးရာ မြဝတီဘက်မှ မျက်နှာကြက် ကျောက်ပြားများ၊ အိမ်သာကြွေခွက်များ တင်ဆောင်လာသော ၁၈ ဘီး ကုန်တင်ယာဉ်သည် ရင်ကွဲတောင်ကုန်းဆင်း နတ်စင်အနီး ၁၅၄ ကီလိုမီတာနှင့် ၁၅၅ ကီလို မီတာကြား ကွေ့အရောက်တွင် အရှိန်မထိန်းနိုင်ဘဲ လမ်း၏ အကာအရံတိုင်များကိုတိုက်ကာ ယာဘက်ချောက်ထဲသို့ တိမ်းမှောက်သွားခဲ့ခြင်းဖြစ်ကြောင်း သိရသည်။
ယာဉ်တိမ်းမှောက်မှု ဖြစ်စဉ်ကြောင့် ယာဉ်မောင်း မျိုးဇော်၏ ယာလက်၊ ယာခြေ ထောက်၊ မေးစေ့ဒဏ်ရာများ ရရှိခဲ့ပြီး ယာဉ် နောက်လိုက် ငမျိုးတွင် နဖူးပိန်ချိုင့်၊ နှာခေါင်း၊ ပါးစပ်၊ နားတို့တွင် သွေးထွက် ဒဏ်ရာရရှိ၍ လူမှုကယ်ဆယ်ရေးအဖွဲ့ဝင်များက ရဲဆေးစာ နှင့်အတူ ကော့ကရိတ်ဆေးရုံသို့ ပို့ဆောင်စဉ် သေဆုံးသွားခဲ့သည်။
ယာဉ်တိမ်းမှောက်မှုကြောင့် ကုန်တင်ယာဉ်ပေါ်တွင် တင်ဆောင်လာသော ကျောက်ပြားများ၊ ကြွေအိမ်သာခွက်များ ကျိုးကျေပျက်စီးပြီး ယာဉ်မှာလည်း ဦးခေါင်းပိုင်း ပိန်ချိုင့်သွားခဲ့ကြောင်း သိရသည်။
မြဝတီ-ကော့ကရိတ်ဒေါနတောင် ကျော် အာရှလမ်းသစ်သည် အတက်ရှည်အ ဆင်းရှည်ခြင်းကြောင့် ယာဉ်မောင်းများ သတိပြုမောင်းနှင်ကြရန် ဒေသခံတစ်ဦးဖြစ်သူ ဦးသက်ဦးက ပြောကြားသည်။
သို့ဖြစ်၍ ယာဉ်ကိုပေါ့ဆစွာ မဆင်မခြင်မောင်းနှင်ပြီး ယာဉ်အား လမ်းယာဘက်သို့ ထိုးကျပြီး တစ်ဦးသေဆုံးခဲ့ခြင်းကြောင့် ယာဉ်မောင်း မျိုးဇော်အား ကော့ကရိတ်ရဲစခန်းက ယာဉ်(ပ) ၁/၂၀၂၀ ရာဇသတ်ကြီး ပုဒ်မ ၃၀၄ -ကအရ အရေးယူစစ်ဆေးလျက်ရှိကြောင်း ကော့ကရိတ်မြို့မရဲစခန်းမှ သိရသည်။
-
နောက်ထပ် ၅ ရက်အတွင်း ရန်ကုန်အပါအဝင် တိုင်းနှင့်ပြည်နယ် အများစု၌ မိုးသည်းထန်စွာရွာသွန်းမည်
-
ယာယီပိတ်ထားရသည့် အ.ထ.က(ဆန်ဆိုင်း)ပြန်လည်ဖွင့်လှစ်
-
ရန်ကုန်တိုင်းဒေသကြီးအတွင်း ရေကြီးနစ်မြုပ်ခဲ့သည့် မိုးစပါးစိုက်ခင်း (၄၆၇၉၆ )ဧက ပြန်လည်စိုက်ပျိုးထား
-
မြန်မာ-ထိုင်းနယ်စပ်ကုန်သွယ်ရေး ပုံမှန်အတိုင်းသွားလာနေပြီဖြစ်ဟုဆို
-
ထိုင်းတွင် မုန်တိုင်းသတိပေးချက် ထုတ်ပြန်ထား
