Top News

ကိုရီးယားအမျိုးသား အဆိုတော်အဖွဲ့ BTS သည် Billboard 200 စာရင်းတွင် တစ်နှစ်ကြာဖော်ပြခံခဲ့ရသည့် ပထမဆုံး ကေပေါ့ပ်အဆိုတော်အဖွဲ့ ဖြစ်လာခဲ့သည်ဟု Forbes မဂ္ဂဇင်းက ထုတ်ပြန်ခဲ့သည်။

Bangtan Boys ဟုလည်း ခေါ်ဆိုသည့်  BTS အဖွဲ့၏ Love Yourself: Answer  အယ်လ်ဘမ်သည် နိုဝင်ဘာ ၄ ရက်က ထုတ်ပြန်ခဲသည့် Billboard အယ်လ်ဘမ် ရောင်းချမှုစာရင်းတွင် နံပါတ် ၁၆၅ နေရာ၌ ဖော်ပြခံခဲ့ရသည်။

၂၀၁၈ ခုနှစ် သြဂုတ် ၂၄ ရက်တွင် ဖြန့်ချိခဲ့သည့် ယင်းအယ်လ်ဘမ်သည် Billboard 200  စာရင်းတွင် သီတင်းပတ် ၅၂ ပတ် ဖော်ပြခံခဲ့ရသည်ဟု Billboard မဂ္ဂဇင်း၏ ထုတ်ပြန်ချက်အရ သိရသည်။ ယင်းအယ်လ်ဘမ်သည် ပွဲဦးထွက်ဖြန့်ချိသည့် သီတင်းပတ်၌ BIllboard ၏ အဆိုပါစာရင်းတွင် နံပါတ် ၁ အဖြစ် ဖော်ပြခံခဲ့ရသည်။

BTS အဖွဲ့၏ Map of the Soul: Persona အယ်လ်ဘမ်သည်လည်း ယခုသီတင်းပတ်တွင် Billboard 200 စာရင်း၏နံပါတ် ၁၄၉ နေရာတွင် ဖော်ပြခံခဲ့ရသည်။ ယင်းအယ်လ်ဘမ်သည်လည်း အဆိုပါစာရင်းတွင် ဖော်ပြခံရသည်မှာ သီတင်းပတ်၂၅ ပတ် ကြာပြီ ဖြစ်သည်။

၂၀၁၃ ခုနှစ်တွင် အမျိုးသားအဆိုတော် ခုနစ်ဦးဖြင့် ဖွဲ့စည်းထားသည့် BTS  အဖွဲ့သည် ၎င်းတို့၏ သီချင်းအများစုကို ကိုယ်တိုင်ရေးသားခဲ့သည်။ မူလက ဟစ်ဟော့ပ်အဖွဲ့အဖြစ် ဖွဲ့စည်းသော်လည်း နောက်ပိုင်းတွင် ဂီတအမျိုးအစားများ ပြောင်းလဲလာခဲ့သည်။ ၎င်းတို့၏ သီချင်းစာသားများသည် ကိုယ်ရေးကိုယ်တာ၊ လူမှုရေးဝေဖန်သုံးသပ်ချက်၊ စိတ်ကျန်းမာရေး၊ ကျောင်းနေအရွယ်လူငယ်များ၏ ပြဿနာများ စသည့်အကြောင်းအရာများကို အဓိကထား ရေးသားလေ့ ရှိသည်။

အချိန်တိုအတွင်း ကမ္ဘာတစ်ဝန်း အောင်မြင်မှုရရှိသည့် ကေပေါ့ပ်အဆိုတော်အဖွဲ့ ဖြစ်လာခဲ့သည့် BTS အဖွဲ့သည် ယူနီဆက်ဖ်နှင့် ပူးပေါင်းပြီး အကြမ်းဖက် ဆန့်ကျင်ရေးလှုပ်ရှားမှု Love Myself ကို စတင်ခဲ့ပြီးနောက်  ၂၀၁၈ ခုနှစ်တွင် ကုလသမဂ္ဂအထွေထွေ ညီလာခံတွင် မိန်ခွန်းပြောကြားခွင့် ရရှိခဲ့သည်။ ယင်းအဖွဲ့သည် ကိုရီးယားယဉ်ကျေးမှုနှင့် ဘာသာစကားကို ကမ္ဘာတစ်ဝန်းပျံ့နှံ့စေရန် ဆောင်ရွက်ခဲ့မှုများအတွက် တောင်ကိုရီးယားသမ္မတ မွန်းဂျေအင်းက ပေးအပ်သည့် Order of Cultural Merit ကို ရရှိသည့် အသက်အငယ်ဆုံး အဆိုတော်အဖွဲ့လည်း ဖြစ်သည်။