အသစ်ထွက်လာသည့် ရုပ်ရှင်ကားနှစ်ကားနှင့် ယှဉ်ပြိုင်ရမှုများရှိကာ ဝေဖန်မှုများနှင့် ရင်ဆိုင်နေရသော်လည်း Suicide Squad ရုပ်ရှင်သည် ဝင်ငွေအများဆုံး ရုပ်ရှင် စာရင်း၏ ထိပ်ဆုံးတွင် သီတင်းနှစ်ပတ်ဆက်တိုက် ရပ်တည်ခဲ့သည်။
လျှို့ဝှက်တာဝန်ထမ်းဆောင်ရန် တာဝန်ပေးခံရသည့် အန္တရာယ်များသော ရာဇဝတ်ကောင်များအဖွဲ့ အကြောင်းရိုက်ကူးထားသော ထိုအက်ရှင်ရုပ်ရှင်သည် ပြသသည့် ဒုတိယမြောက် သီတင်းပတ်တွင် ဝင်ငွေ ဒေါ်လာ ၄၃ ဒသမ ၈ သန်းရရှိခဲ့သည်။
Suicide Squad သည် စာရင်း၏ ထိပ်ဆုံး၌ ဆက်လက် ရပ်တည်နေသော်လည်း စတင် ပြသသည့် ပထမသီတင်းပတ်အတွင်းက ဒေါ်လာ ၁၃၃ ဒသမ ၇ သန်းရရှိခဲ့ရာမှ ဝင်ငွေထိုးကျခဲ့ခြင်းဖြစ်သည်။
စာရင်း၏ ဒုတိယနေရာတွင် ရပ်တည်နေသည့် ဇာတ်ကားမှာ အရွယ်ရောက်ပြီးသူများသာ ကြည့်ရန်သင့်တော်သည့် အန်နီမေးရှင်းကား Sausage Party ဖြစ်သည်။ ထို ရုပ်ရှင်ထဲ၌ အဓိကဇာတ်ရုပ်၏ အသံသရုပ်ဆောင်မှာ ဆက်ရိုဂန်ဖြစ်သည်။
Sausage Partyသည် ပွဲဦးထွက်ပြသသည့် သီတင်းပတ်တွင် ဒေါ်လာ ၃၃ ဒသမ ၆ သန်းရရှိထားသည်။ နောက်ထပ် ရုပ်ရှင်ကားသစ်တစ်ကားဖြစ်သည့် Pete's Dragon သည် ဝင်ငွေဒေါ် လာ ၂၁ ဒသမ ၅ သန်းဖြင့် တတိယမြောက် ဝင်ငွေအများဆုံး ဇာတ်ကားအဖြစ် ရပ်တည်နေသည်။
မိဘမဲ့ ကောင်လေးတစ်ယောက်နှင့် (ကွန်ပျူတာအထူးပြုလုပ်ချက်သုံး၍ ဖန်တီးထားသော ) နဂါးတစ်ကောင်တို့ မိတ်ဆွေ ဖြစ်သည့်အကြောင်းကို ရိုက်ကူးထားသည့် Pete's Dragon သည် ၁၉၇၇ ခုနှစ်က ရုပ်ရှင်ကို ဒစ္စနေက ပြန်လည် ဆန်းသစ်ထားခြင်း ဖြစ်သည်။
မက်ဒေမွန် အဓိကပါဝင်သရုပ်ဆောင်ထားသော သူလျှိုဇာတ်လမ်းဖြစ် Jason Bourne သည် ဝင်ငွေဒေါ်လာ ၁၃ ဒသမ ၆ သန်းဖြင့် စတုတ္ထနေရာတွင် ရပ်တည်နေသည်။
-
တန်ဆောင်မုန်းလပြည့်ည ရန်ကုန်မြို့ ပြည်သူ့ရင်ပြင် စျေးရောင်းပွဲတော်နှင့် ဂီတပွဲတော်မြင်ကွင်းများ
-
ပြိုင်ဆိုင်မှုပြင်းထန်ဦးမယ့် ESM ခြေလှမ်းများ
-
ရေးမြို့၊ အောင်မင်္ဂလာရပ်ကွက်လုံးကျွတ် တန်ဆောင်တိုင်ဆွမ်းကြီးလောင်းပွဲနှင့် နိဗ္ဗာန်ဈေးအလှူပွဲ မြို့ခံပြည်သူများ၊ ဒေသခံပြည်သူများဖြင့် စည်ကား
-
ဖိလစ်ပိုင်မြောက်ပိုင်းတွင် တိုင်ဖွန်းအူဆာဂီ ဝင်ရောက်တိုက်ခတ်မှုကြောင့် လူပေါင်းထောင်နှင့်ချီ ဘေးလွတ်ရာရွှေ့ပြောင်း
-
ဆော်လမွန်ကျွန်းနိုင်ငံအနီးတွင် ကမ္ဘာ့အကြီးဆုံး သန္တာကျောက်တန်း တွေ့ရှိ
