Top News

ရုပ်ရှင်မင်းသမီး ​ဒေါ်မြသက်​မော် (ခ) မင်းသမီးကြီး မိုးနတ်သူဇာသီတာဝင်း ​မေ ၉ ရက်က ရန်ကုန်မြို့၌ ကွယ်လွန်သွားခဲ့သည်ဟု သိရသည်။ ကွယ်လွန်ချိန်တွင် မင်းသမီးကြီး သီတာဝင်းသည် အသက် ၆၃ နှစ်ရှိပြီ ဖြစ်သည်။

ရန်ကုန်တက္ကသိုလ်​ ကျောင်းသူဘဝကတည်းက အနုပညာခရီးလမ်းကိုအစပျိုးခဲ့သူ မင်းသမီးကြီး သီတာဝင်းသည် အဆုတ်ကင်ဆာ​ရောဂါဖြင့် ရန်ကုန်မြို့ ပန်းလှိုင်​ဆေးရုံ ကြီးတွင် တက်​ရောက်​ဆေးကုသမှုခံယူ​နေစဉ် ​မေ ၉ ရက် တနင်္ဂ​နွေ​နေ့ ည ၁၁ နာရီခွဲတွင် ကွယ်လွန်သွားခဲ့ခြင်းဖြစ်​ကြောင်း သိရသည်။

မင်းသမီး သီတာဝင်းသည် မိုးနတ်သူဇာအငြိမ့်အဖွဲ့၏ ​ပင်တိုင်​မင်းသမီးအဖြစ် ပရိသတ်ခ​ျစ်ခင်အား​ပေးမှုများစွာ ရရှိခဲ့သူဖြစ်သည်။ ၁၉၈၀ ပြည့်နှစ်ဝန်းကျင်မှစတင်ကာ ပရိသတ်များ၏အား​ပေးမှုနှင့်အတူ ​အောင်မြင်လာခဲ့သည့် မိုးနတ်သူဇာအငြိမ့်နှင့်အတူ မင်းသမီးသီတာဝင်းသည် ရုပ်ရှင်ဇာတ်ကားများလည်း ရိုက်ကူးခဲ့သည့် မင်းသမီးတစ်ဦး ဖြစ်သည်။ မင်းသမီးကြီး သီတာဝင်းသည် မိုးနတ်သူဇာအငြိမ့်အဖွဲဲ့နှင့်အတူ “ဦးသဝန်မကြောင်အငြိမ့်” နှင့် “ချစ်ပါရမီရှင်အငြိမ့်” ကက်ဆက်​ခွေများကို ကိုယ်တိုင်စီစဉ်ထုတ်​ဝေခဲ့ပြီး ပရိသတ်အား​ပေးမှုများစွာရရှိသည်။

ထို့ပြင် ဆရာနန်းညွန့်​ဆွေစီစဉ်ပြီး မင်းသမီးသီတာဝင်းနှင့်အတူ လူရွှင်​တော် ဇာဂနာ၊ စုတ်ချွန်း၊ ပိန်ပိန်၊ တက်တူတို့၏ “မိုးနတ်သူဇာအငြိမ့်” ကက်ဆက်​ခွေအပါအဝင် ကက်ဆက်​ခွေများနှင့် အငြိမ့်ဗီဒီယိုခွေများ ထုတ်ဝေခဲ့ပြီး ပရိသတ်အား​ပေးမှုမ​ျားစွာ ရရှိခဲ့သည်။ ယင်းအပြင် မြန်မာ့အသံနှင့် ရုပ်မြင်သံကြားတွင် တင်ဆက်ခဲ့သည့် မိုးနတ်သူဇာအငြိမ့်မှာလည်း ပြည်သူများအကြား ​ရေပန်းစားလူကြိုက်များခဲ့သည်။

မင်းသမီးကြီးသီတာဝင်းသည် မျိုးဆက်သစ် အနုပညာရှင်များစွာကို အကပညာရပ်များ သင်ကြားပေးခဲ့သူဖြစ်သည်။ ​မေ ၉ ရက် ညပိုင်းတွင် ကွယ်လွန်ခဲ့သည့် မင်းသမီးကြီး သီတာဝင်းအတွက် အနုပညာအသိုင်းအဝိုင်းမှ ဝမ်းနည်း​ကြောင်း​ရေးသားကာ ဆု​တောင်းမှုများပြုလုပ်​ပေးခဲ့ကြသည်။

ရုပ်ရှင်မင်းသမီး ​ဒေါ်မြသက်​မော် (ခ) မင်းသမီးကြီး မိုးနတ်သူဇာ သီတာဝင်း၏ စျာပနာကို ​မေ ၁၁ ရက် အင်္ဂါ​နေ့ ည​နေ ၄ နာရီတွင် ရန်ကုန်မြို့​ ရေ​ဝေးသုသာန်၌ ပို့​ဆောင်မီးသင်္ဂြိုဟ်ခဲ့သည်ဟု သိရသည်။ ကွယ်လွန်သူအားရည်စူး၍ ကုသိုလ်ပြုမည့် ရက်လည်ဆွမ်း​ကျွေးကို ရန်ရစ်သူမိသားစုများက  ​မေ  ၁၅ ရက်​တွင် ပြုလုပ်သွားမည်ဟု သိရသည်။