Top News

အမေရိကန်အဆိုတော် မိုင်လေဆိုင်းရပ်စ်က သြစတြေးလျရုပ်ရှင်မင်းသား လီယမ်ဟမ်းစ်ဝါ့နှင့် သူ့အိမ်ထောင်ရေးက ကံဆိုးမှုတစ်ခုဟု ဘရာဇီးတွင်ပြုလုပ်သည့်ဖျော်ဖြေပွဲတစ်ခုတွင် ထုတ်ဖော်ပြောဆိုခဲ့သည်။

နာမည်ကျော် Midnight Sky သီချင်း သီဆိုသူဆိုင်းရပ်စ်က မတ် ၂၆ ရက်ညက  ဆော်ပိုလိုမြို့တွင်ပြုလုပ်သည့်ပွဲတော်တွင် ပါဝင်ဖျော်ဖြေခဲ့ပြီး လက်ထပ်ခွင့်တောင်းမည့် လိင်တူစုံတွဲတစ်တွဲကို စင်ပေါ်ခေါ်ခဲ့သည်။

၎င်းအတွဲကိုဂုဏ်ပြုပြီးသည့်နောက် ဆိုင်းရပ်စ်က “မင်းတို့အိမ်ထောင်ရေး ငါ့ထက် သာပါစေလို့ ဆုတောင်းပါတယ်၊ငါကတော့ ကံဆိုးခဲ့တယ်”ဟု ပြောသွားခဲ့သည်။

အသက် ၂၉ နှစ်အရွယ် မိုင်လေဆိုင်းရပ်စ်က Attention : Miley Live အမည်ဖြင့်   တေးအယ်လ်ဘမ်သစ်ထွက်ဦးမည်ဟုလည်း ဖျော်ဖြေပွဲတွင်ကြေညာခဲ့သည်။ ၎င်းအခွေက ဧပြီ ၁ ရက်တွင် ထွက်လာမည်ဖြစ်သည်။

ဆိုင်းရပ်စ်သည် Hunger Games သရုပ်ဆောင် လီယမ်ဟမ်းစ်ဝါ့နှင့်လက်ထပ်ပြီး တစ်နှစ်အတွင်း ၂၀၁၉ ခုနှစ်၊ သြဂုတ်တွင် လမ်းခွဲလိုက်သည်။

ယခင်ကတည်းက သူတို့အိမ်ထောင်ရေးတွင် အဆင်မပြေမှု၊ ပဋိပက္ခများစွာ ရှိနေခဲ့သည်ဟု  ဆိုင်းရပ်စ်ကဝန်ခံခဲ့ဖူးသည်။ “အဆင်မပြေတာတွေ အများကြီးပဲ၊ ကျွန်မ အိမ်ပြန်လာရင် တစ်စုံတစ်ဦးကို မှီတွယ်ထားချင်မိတယ်”ဟု သူပြောခဲ့ဖူးသည်။

သူတို့နှစ်ဦးသည် ၂၀၁၂ ခုနှစ်၊ မေတွင် စေ့စပ်ခဲ့ကြပြီး တစ်နှစ်ကျော်အကြာ ၂၀၁၃ ခုနှစ်၊ စက်တင်ဘာတွင်ပြတ်သွားကြသည်။ သို့သော် ၂၀၁၆ ခုနှစ်တွင် ပြန်တွဲခဲ့ကြသည်။

မိုင်လေဆိုင်းရပ်စ်သည် မကြာသေးမီက ပါရာဂွေးနိုင်ငံတွင်ပြုလုပ်သည့် ဂီတပွဲတစ်ခုသို့အသွား လေယာဉ်ကိုမိုးကြိုးထိမှန်ခဲ့မှုကြောင့် ဘရာဇီးနှင့်ထိစပ်နေသည့် ပါရာဂွေး နယ်စပ်မြို့လေးအနီး အခြားလေဆိပ်တစ်ခုတွင် လေယာဉ်အရေးပေါ်ပြောင်းဆင်းလိုက်ရသည်။ ထို့နောက်ဆိုင်းရပ်စ်သည် ဆော်ပိုလိုသို့ ဆက်လက်ထွက်ခွာသွားသည်ဟု ပါရာဂွေးမြို့ပြလေကြောင်းဦးစီးဌာနရုံးက ပြောသည်။ ဆိုင်းရပ်စ်နှင့်အတူလိုက်ပါသွားကြသည့် တီးဝိုင်းအဖွဲ့သားများ၊ မိသားစုဝင်၊ မိတ်ဆွေအားလုံးလည်း ဘေးကင်းခဲ့သည်။