Top News

၂၀၂၂ ခုနှစ်အတွက်  အီတလီနိုင်ငံ မြောက်ပိုင်းတူရင်မြို့တွင် Eurovision ခေါ် ဥရောပ၏ အကြီးကျယ်ဆုံးသီချင်းဆိုပြိုင်ပွဲ ကြီး ကျင်းပနေစဉ်အတောအတွင်း ရုရှားအစိုးရ လိုလားသည့် ဟက်ကာသမားများက ပြိုင်ပွဲအတွက်မဲပေးမှုကို ကဖျက်ကယက်လုပ်ရန် ကြိုးပမ်းခဲ့သည်ဟု အီတလီရဲတပ်ဖွဲ့က ပြောကြားထားသည်။

အီတလီရဲတပ်ဖွဲ့ထုတ်ဖော်ကြေညာချက်အရ Killent ဟု ခေါ်သည့် ဟက်ကာ အုပ်စုက  ယူကရိန်းနိုင်ငံကိုယ်စားပြုအဖွဲ့ ပါဝင်ယှဉ်ပြိုင်ခဲ့သည့်  ပထမဆီမီးဖိုင်နယ်ပွဲနှင့် မေလ ၁၄ ရက်က ဗိုလ်လုပွဲကို  ပစ်မှတ်ထား နှောင့်ယှက်ခဲ့ခြင်းဖြစ်သည်။

သို့သော် အီတလီဆိုက်ဘာလုံခြုံရေး ဌာနက ထိုသို့နှောင့်ယှက်မှုများကို ဟန့်တားနိုင်ခဲ့သည်ဟု ရဲတပ်ဖွဲ့က ပြောကြားသည်။

ဒိုင်အဖွဲ့ကပေးသည့်အမှတ်နှင့် ပရိသတ်ပေးသည့်အမှတ်တို့ ပေါင်းပြီး ယူကရိန်း ကိုယ်စားပြုအဖွဲ့ Kalush Orchestra က ဗိုလ်စွဲသွားပြီး ဗိုလ်လုပွဲမတိုင်မီကတည်းက ၎င်းရက်ပ်အဖွဲ့သည် Winner အဖြစ် တစ် ပေးခံခဲ့ရသည်။ ၎င်းအဖွဲ့၏ပြိုင်ပွဲသီချင်း Steaania  သည် ဟစ်ဟော့ပ်နှင့် ရိုးရာယူကရိန်းဂီတကို ပေါင်းစပ်ထားပြီး ယူကရိန်းကို ရုရှားကမကျူးကျော်မီ ရေးစပ်ထားသည့် သီချင်းဖြစ်သည်။

Kalush Orchestra သည် ပြိုင်ပွဲသို့ သွားရောက်ယှဉ်ပြိုင်ရန် အစိုးရ၏ အထူးခွင့်ပြုချက်ရပြီးမှ သွားပြိုင်ခဲ့ခြင်းဖြစ်သည်။ ရုရှား-ယူကရိန်းစစ်ပွဲစတင်ချိန်မှစ၍ ၎င်းအဖွဲ့သည် ရုရှားရန်ကိုယူကရိန်းတို့ခုခံနေမှုအပေါ်ထောက်ခံဖော်ပြမှုများ ဆိုရှယ်မီဒီယာတွင် ပြုလုပ်လာခဲ့သည်။

တင်ဆက်မှုအဆုံးတွင် ၎င်းအဖွဲ့က ကျေးဇူးပြုပြီး ယူကရိန်းကိုကူညီပါဟု မေတ္တာ ရပ်ခံသွားခဲ့သည်။ထူးထူးခြားခြားအနေဖြင့် ဗြိတိန်ကိုယ်စားပြုယှဉ်ပြိုင်သည့် ဆမ်ရိုင်ဒါက ဒုတိယရခဲ့ပြီး ၁၉၉၈ ခုနှစ်နောက်ပိုင်း ဗြိတိန် အတွက်အကောင်းဆုံးရလဒ်ဟုဆိုရမည်။ ၂၀၁၉ နှင့် ၂၀၂၁ ခုနှစ်ပြိုင်ပွဲများတွင် ဗြိတိန် က ဘိတ်ဆုံးနေရာသာရခဲ့သည်။

ယခုနှစ်ပြိုင်ပွဲ၏ တတိယနေရာကို စပိန် ၊ စတုတ္ထနေရာကို ဆွီဒင်၊ ပဥ္စမနေရာကို ဆားဘီးယားနိုင်ငံတို့က ရယူခဲ့သည်။ရုရှားနိုင်ငံ ကမူ ယခုနှစ်တွင် ဝင်ပြိုင်ခွင့်မရခဲ့ပေ။

Winner နိုင်ငံက၂၀၂၃ ပြိုင်ပွဲကို အိမ်ရှင်အဖြစ်ကျင်းပရမည်ဖြစ်ပြီး ယူကရိန်းက ထိုသို့ကျင်းပနိုင်၊မနိုင် သံသယရှိနေကြသည်။သို့သော်ယူကရိန်းသမ္မတက အတတ်နိုင်ဆုံး  ကြိုးစားကျင်းပမည်ဟု ကတိပေးထားသည်။