Top News

ပြင်သစ်တွင် ကျင်းပနေသည့် ၇၅ ကြိမ် မြောက် ကိန်းရုပ်ရှင်ပွဲတော်တွင် အက်ရှင်မင်းသားတွမ်ခရုစ်က ဂုဏ်ထူးဆောင် Palme d’Or ဆုကိုလက်ခံရယူခဲ့သည်။

တွမ်ခရုစ်သည် သူ့ဇာတ်ကား Top  Gun : Maverick ကို ရုပ်ရှင်ပွဲတော်တွင် ပွဲဦးထွက်ပြသရန် မေလ ၁၈ ရက်က ပွဲတော်ကျင်းပရာနေရာသို့ ရောက်လာခဲ့ပြီး ၊ အနှစ် ၃၀ အတွင်း ကိန်းရုပ်ရှင်ပွဲတော်သို့ ပထမဆုံး အကြိမ် တက်ရောက်လာခြင်းဖြစ်သည်။

ထိုနေ့ကကောင်းကင်ယံတွင် ပြင်သစ် လေတပ်လေယာဉ်များကလည်း အလှပြပျံသန်းမှုများ ပြုလုပ်ခဲ့သည်။

၁၉၈၆ Top Gun ရုပ်ရှင်၏ နောက်ဆက်တွဲဇာတ်လမ်းဖြစ်သည့် Top  Gun : Maverick ကို၂၀၂၀ ခုနှစ်ကိန်းရုပ်ရှင်ပွဲတော်တွင် ပြသရန်စီစဉ်ခဲ့ပြီးမှ ကိုဗစ်ကပ်ရောဂါကြောင့် ရုပ်ရှင်ပွဲတော်မကျင်းပဖြစ်ခဲ့ပေ။ ရုံတင်ပြသရန် ၂၀၂၀ ကတည်းက ကြိုးစားခဲ့ကြသော်လည်း အကြိမ်ကြိမ်ရွှေ့ဆိုင်းဖြစ်ခဲ့ပြီး ယခုမေလနှောင်းပိုင်းတွင် ရုံတင်ပြသတော့မည်ဖြစ်သည်။

ပရိသတ်များ မျှော်တလင့်လင့်ဖြစ်နေသည့် ထိုဇာတ်ကားတွင် တွမ်ခရုစ်ကို ရေတပ် လေယာဉ်မှူးအဖြစ် မြင်တွေ့ရမည်။

ခရုစ်သည် ရုပ်ရှင်ရုံများကို နဂိုအခြေအ နေအတိုင်း ပြန်မြင်တွေ့ရန် အားခဲထားသူဖြစ်ပြီး Top  Gun : Maverick ကို streaming ပြသရန် ဘယ်တုန်းကမှမစဉ်းစားခဲ့ဖူးဟု ဆိုသည်။

“ကျွန်တော် ဇာတ်ကားတွေရိုက်တာဟာ ရုံတင်ဖို့ပါ။ ရုပ်ရှင်ရုံကို ကျွန်တော်ကြိုက်တယ် ။ဇာတ်ကားတွေရုံတင်ရင်လည်း ကျွန်တော် အမြဲရုံသွားကြည့်တယ်။ဦးထုပ်ဆောင်းပြီး ပရိသတ်တွေကြားထဲရောပြီးတော့ပေါ့” ဟု  ခရုစ်က ကိန်းရုပ်ရှင်ပွဲတော်ပရိသတ်များ အားပြောသည်။

တွမ်ခရုစ်သည် ၁၉၉၂ ခုနှစ်က Far and Away ဇာတ်ကား ပွဲဦးထွက်ပြသရန် ကိန်းရုပ်ရှင်ပွဲတော်သို့ နောက်ဆုံးအကြိမ် တက်ရောက်ထားသည်။သူနှင့်အတူ ဇနီးဟောင်း နစ်ကိုးကစ်ဒမန်းလည်း အတူတက်ခဲ့ သည်။ခရုစ်သည် ထိုခေတ်အခါက ဟောလိဝုဒ်၏နာမည်အကြီးဆုံးစတားတစ်ဦးဖြစ်ပြီး  ယခုနှစ်တွင် အသက် ၆၀ ပြည့်တော့မည့်တိုင် ကျော်ကြားမှုက လျော့မသွားသေးပေ။

သူသည် အန္တရာယ်ရှိသည့်စတန့်ပြကွက်များကို ကိုယ်တိုင်သရုပ်ဆောင်လေ့ရှိပြီး Mission Impossible 7 တွင် ခရုစ်၏ အန္တရာယ်အများဆုံး ဇာတ်ဝင်ခန်းများကို ရင်ခုန်ဖွယ် ကြည့်ရှုရမည်ဖြစ်သည်။