အစိုးရနှင့် မြောက်ပိုင်းမဟာမိတ် တိုင်းရင်းသား လက်နက်ကိုင်အဖွဲ့ လေးဖွဲ့တို့ ဇန်နဝါရီလကုန်ပိုင်းတွင် အလွတ်သဘော ပြန်လည်တွေ့ဆုံကြမည်ဖြစ်ပြီး ထိုသို့တွေ့ဆုံရာတွင် တရုတ်နိုင်ငံ ကူမင်းမြို့တွင် အလွတ်သဘော ပြုလုပ်ခဲ့သော တွေ့ဆုံဆွေးနွေးပွဲမှ နှစ်ဖက်အဆိုပြု ဆွေးနွေးချက်များ ညှိနှိုင်းမှု အဆင်ပြေပါက အပစ်အခတ်ရပ်စဲရေးစာချုပ် (Bilateral) လက်မှတ်ရေးထိုးရန် အခြေအနေကောင်းကြောင်း ကချင်ငြိမ်းချမ်းရေး အကျိုးဆောင်အဖွဲ့ (PCG) အဖွဲ့ဝင် ဦးလမိုင်ဂွန်ဂျာက ပြောကြားသည်။
အစိုးရကိုယ်စားလှယ်အဖွဲ့နှင့် မြောက်ပိုင်းမဟာမိတ်လေးဖွဲ့မှ ကိုယ်စားလှယ်များ တရုတ်နိုင်ငံ၊ ကူမင်းမြို့တွင် ဒီဇင်ဘာ ၁၅ ရက်က အလွတ်သဘော တွေ့ဆုံခဲ့ကြပြီး ထိုသို့တွေ့ဆုံရာတွင် နှစ်ဖက်ဖမ်းဆီးထားသူများအား ပြန်လွှတ်ပေးရေးနှင့် နှစ်ဖက်အကြား ပြဿနာ ဖြစ်ပွားပါက ကြားနိုင်ငံတစ်ခုက ပါဝင်ညှိနှိုင်း ဖြေရှင်းပေးရေးတို့ကို မြောက်ပိုင်းမဟာမိတ်လေးဖွဲ့က အစိုးရကိုယ်စားလှယ်အဖွဲ့ထံ တင်ပြခဲ့ခြင်းဖြစ်သည်။
“ဒီကိစ္စနဲ့ပတ်သက်ပြီး ဒီတစ်ခေါက် ကူမင်းမှာ နှစ်ဖက်အလွတ်သဘော တွေ့တဲ့အချိန်မှာ နှစ်ဖက်ညှိနှိုင်းတယ်။ အဆင်တော့ ပြေနေပါတယ်။ ပြေနေတဲ့အပေါ်မှာ နှစ်ဖက်အဖွဲ့ ဆွေးနွေးတဲ့အပေါ်မှာ မြောက်ပိုင်းအဖွဲ့ရဲ့ ဆွေးနွေးချက်တွေကို NRPC က ပြန်ယူသွားတယ်။ NRPC ရဲ့ ဆွေးနွေးချက်တွေကို မြောက်ပိုင်းအဖွဲ့တွေက ပြန်ယူသွားတယ်။ ယူသွားပြီးတော့ ဇန်နဝါရီလကုန် အလွတ်သဘော တွေ့တဲ့အချိန်မှာ အဲဒီအပိုင်းတွေ အားလုံးအဆင်ပြေရင် လက်မှတ်ထိုးဖို့က ကောင်းသွားမယ့် အခြေအနေရှိတယ်” ဟု PCG အဖွဲ့ဝင် ဦးလမိုင်ဂွန်ဂျာက ပြောကြားသည်။
ဇန်နဝါရီလကုန်ပိုင်းတွင် ပြုလုပ်ရန် နှစ်ဖက်သဘောတူထားသည့် အစိုးရကိုယ်စားလှယ်အဖွဲ့နှင့် မြောက်ပိုင်းမဟာမိတ် တိုင်းရင်းသား လက်နက်ကိုင်အဖွဲ့ လေးဖွဲ့တို့၏ တွေ့ဆုံဆွေးနွေးပွဲသည် အလွတ်သဘော တွေ့ဆုံဆွေးနွေးပွဲပင်ဖြစ်ပြီး အဆိုပါ အလွတ်သဘော တွေ့ဆုံဆွေးနွေးပွဲကိုလည်း မြန်မာနိုင်ငံ ပြင်ပတွင်သာ ပြုလုပ်သွားဖွယ်ရှိနေကာ တွေ့ဆုံပွဲနေရာကိုမူ တိတိကျကျ သတ်မှတ်ရခြင်း မရှိသေးကြောင်း ဦးလမိုင်ဂွန်ဂျာက ဆိုသည်။
“ဒီတစ်ခေါက်ကလည်း အလွတ်သဘောပဲတွေ့မှာ ဖြစ်တဲ့အတွက်ကြောင့်လေ။ အဲဒါကြောင့် ဘယ်နေရာမှာဆိုတာ အတိအကျ မရှိသေးဘူး။ အခုက တရားဝင် မဟုတ်သေးဘူး။ အလွတ်သဘောပဲ။ အခုလောလောဆယ် အချက်သုံးလေးချက်လောက်ကို သဘောတူညီမှုရမယ် ဆိုရင်တော့ Bilateral Ceasefire Agreement လက်မှတ်ထိုးဖို့ဆိုပြီး ပြောထားတာရှိတယ်” ဟု ဦးလမိုင်ဂွန်ဂျာက ပြောကြားသည်။
မြောက်ပိုင်း မဟာမိတ်လေးဖွဲ့ဖြစ်သည့် ကချင်အဖွဲ့ (KIA)၊ တအာင်းအဖွဲ့ (TNLA)၊ ကိုးကန့်အဖွဲ့ (MNDAA) နှင့် ရခိုင်အဖွဲ့ (AA) တို့ အပစ်အခတ်ရပ်စဲရေး လက်မှတ်ရေးထိုးနိုင်ရေးအတွက် အစိုးရနှင့် ညှိနှိုင်းဆွေးနွေးမှုများ ပြုလုပ်နေခြင်းဖြစ်ပြီး နှစ်ဖက်အကြား တွေ့ဆုံဆွေးနွေးပွဲ ဖြစ်မြောက်ရေးအတွက် ကချင်ငြိမ်းချမ်းရေး အကျိုးဆောင်အဖွဲ့ (PCG) က ကြားဝင်ညှိနှိုင်း ဆောင်ရွက်ပေးနေခြင်းဖြစ်သည်။
ရှမ်းပြည်နယ် (မြောက်ပိုင်း) မူဆယ်မြို့၊ ရှမ်းပြည်နယ် (အရှေ့ပိုင်း) ကျိုင်းတုံမြို့၊ ရှမ်းပြည်နယ် အထူးဒေသ (၄) မိုင်းလားနှင့် တရုတ်နိုင်ငံ ကူမင်းမြို့တို့တွင် အစိုးရနှင့် မြောက်ပိုင်းမဟာမိတ်လေးဖွဲ့တို့ အပစ်အခတ် ရပ်စဲရေးစာချုပ် လက်မှတ်ရေးထိုးနိုင်ရေးအတွက် တွေ့ဆုံဆွေးနွေးမှုများ ပြုလုပ်ထားသည်။
ထိုသို့တွေ့ဆုံ ဆွေးနွေးမှုများ ပြုလုပ်နေသော်လည်း ရှမ်းပြည်နယ် (မြောက်ပိုင်း) တွင် တပ်မတော်နှင့် TNLA အကြား တိုက်ပွဲဖြစ်ပွားမှုများ ရှိနေသကဲ့သို့ ရခိုင်ပြည်နယ်အတွင်းရှိ မြို့နယ်ခုနစ်မြို့နယ်ခန့်တွင်လည်း တပ်မတော်နှင့် AA တို့အကြား တိုက်ပွဲများ ပြင်းထန်စွာ ဖြစ်ပွားနေသည်။
-
မြန်မာ-တရုတ်နယ်စပ် စီးပွားရေး ပူးပေါင်းဆောင်ရွက်မှုဇုန် တည်ထောင်ရေးတွင် မြန်မာနိုင်ငံ၏ နယ်နိမိတ်ပိုင်နက် နယ်မြေဆုံးရှုံးမှု မရှိစေရေး၊ နှစ်နိုင်ငံအကြား နယ်နိမိတ်သတ်မှတ်ချက်ကို အလေးထားဆောင်ရွက်ရန် စီးပွား/ကူးသန်းဝန်ကြီး ပြောကြား
-
မြန်မာနိုင်ငံဆိုင်ရာ ဂျပန်သံအမတ်ကြီးနှင့် ပြည်ထောင်စုဝန်ကြီးတွေ့ဆုံ၍ ဂျပန်နိုင်ငံကူညီမှုဖြင့် ဆောင်ရွက်နေသည့် ရန်ကုန်မြို့ပတ်ရထားလမ်းနှင့် ရန်ကုန် -မန္တလေး ရထားလမ်း အဆင့်မြှင့်တင်ရေးစီမံကိန်းများ ဆွေးနွေး
-
တရုတ်-မြန်မာ နှစ်နိုင်ငံအကြား တိုက်ရိုက်လေကြောင်းခရီးစဉ်ပျံသန်းသည့် ၁၃ ခုမြောက် တရုတ်လေကြောင်းလိုင်းအဖြစ် Qingdao လေကြောင်းလိုင်း နင်းပေါ်-ရန်ကုန် တိုက်ရိုက်လေကြောင်းခရီးစဉ် စတင်ပျံသန်း
-
အမေရိကန်-တရုတ် ကုန်သွယ်ရေးစစ်ပွဲကြောင့် မြန်မာနိုင်ငံသို့ပြောင်းရွှေ့လုပ်ကိုင်လိုသည့် နိုင်ငံတကာလုပ်ငန်းရှင်များရှိသော်လည်း သုံးလအတွင်း မြေနေရာရရှိရေးဆောင်ရွက်မပေးနိုင်သဖြင့် အာဆီယံနိုင်ငံများသို့ သွားရောက်လုပ်ကိုင်နေကြောင်း ဝန်ကြီးနော်ပန်းသဥ္ဇာမျိုး ပြောက
-
၂၀၂၀ ပြည့်နှစ် မော်တော်ယာဉ်တင်သွင်းမှုမူဝါဒဆိုင်ရာ Model Year သတ်မှတ်ချက် ထွက်ရှိလာပြီး မော်တော်ယာဉ်တင်သွင်းမှု အစီအစဉ်အားလုံးတွင် ယခင်နှစ်ထက် ထုတ်လုပ်သည့်ခုနှစ် တစ်နှစ်စီထပ်တိုး
