ပြည်တွင်းစစ်များချုပ်ငြိမ်းပြီး ငြိမ်းချမ်းရေးကို ဖော်ဆောင်နိုင်ရန်အတွက် ၂၀၂၀ ပြည့်နှစ် ဇန်နဝါရီ ၁ ရက်မှ ဖေဖော်ဝါရီ ၂၉ ရက်အထိ အပစ်ရပ်သက်တမ်းကာလ နှစ်လထပ်မံ တိုးမြှင့်လိုက်ကြောင်း ညီနောင်မဟာမိတ် သုံးဖွဲ့ဖြစ်သည့် တအာင်းအဖွဲ့ (TNLA)၊ ကိုးကန့်အဖွဲ့ (MNDAA) နှင့် ရခိုင်အဖွဲ့ (AA) တို့က ၂၀၂၀ ပြည့်နှစ် ဇန်နဝါရီ ၁ ရက်တွင် ပူးပေါင်းသဘောထား ကြေညာချက် ထုတ်ပြန်သည်။
ညီနောင်မဟာမိတ်သုံးဖွဲ့ အနေဖြင့် အပစ်အခတ် ရပ်စဲရေးဆိုင်ရာစာချုပ် (Bilateral Ceasefire Agreement) သဘောတူ လက်မှတ်ရေးထိုးနိုင်မည့် တွေ့ဆုံဆွေးနွေးရေး လုပ်ငန်းများကို လက်တွေ့ကျကျ ဆောင်ရွက်နိုင်ရန်နှင့် ၂၀၂၀ ပြည့်နှစ် ရွေးကောက်ပွဲတွင် ငြိမ်းချမ်းသော ပတ်ဝန်းကျင်ကို တည်ဆောက်နိုင်ရန် အတွက် ယခုကဲ့သို့ အပစ်ရပ်သက်တမ်း ထပ်မံတိုးမြှင့်ပေးခြင်း ဖြစ်ကြောင်း ယခုသဘောထား ထုတ်ပြန်ချက်တွင် ဖော်ပြခဲ့သည်။
တပ်မတော်အနေဖြင့် တိုင်းရင်းသား လက်နက်ကိုင် အဖွဲ့အစည်း အသီးသီးအပေါ် ထိုးစစ်ဆင်မှုများကို ချက်ချင်းရပ်တန့်ပြီး အပစ်အခတ် ရပ်စဲရေးနှင့် တွေ့ဆုံဆွေးနွေးပွဲများ ဖော်ဆောင်လိုသည့်ဆန္ဒကို အပြည့်အဝ ဖော်ပြကာ တိုင်းရင်းသား လက်နက်ကိုင် အဖွဲ့အစည်းများနှင့် အမြန်ဆုံး အပစ်အခတ်ရပ်စဲရေးစာချုပ် လက်မှတ်ရေးထိုးရန်ကိုလည်း ညီနောင်မဟာမိတ် သုံးဖွဲ့က တိုက်တွန်းသည်။
ယခုကဲ့သို့ ညီနောင်မဟာမိတ်သုံးဖွဲ့က တစ်ဖက်သတ် အပစ်အခတ် ရပ်ဆိုင်းကြောင်း ကြေညာထားသည့် ကာလအတွင်း တပ်မတော်က ၎င်းတို့သုံးဖွဲ့အား ပုံစံအမျိုးမျိုးဖြင့် ထိုးစစ်ဆင်တိုက်ခိုက်နေမည် ဆိုပါက ၎င်းတို့အနေဖြင့်လည်း ခုခံကာကွယ်သွားမည်ဖြစ်ကြောင်း ထုတ်ပြန်ကြေညာချက်တွင် ဖော်ပြခဲ့သည်။
ညီနောင်မဟာမိတ်သုံးဖွဲ့၏ ယခုအပစ်ရပ် ကြေညာချက်သည် တတိယအကြိမ် အပစ်ရပ်သက်တမ်း ထပ်မံတိုးမြှင့်ပေးခြင်းဖြစ်ပြီး ပထမအကြိမ်မှာ ၂၀၁၉ ခုနှစ် စက်တင်ဘာ ၉ ရက်မှ အောက်တိုဘာ ၈ ရက်အထိ တစ်လတာ အပစ်အခတ် ရပ်စဲကြောင်း ကြေညာခဲ့ခြင်းဖြစ်သည်။
ထို့နောက် ၎င်းတို့၏ အပစ်အခတ်ရပ်စဲကြောင်း ကြေညာချက်အား သက်တမ်းတိုးသည့် အနေဖြင့် ၂၀၁၉ ခုနှစ် နှစ်ကုန်ပိုင်းအထိ အပစ်အခတ်ရပ်စဲကြောင်း စက်တင်ဘာ ၂၀ ရက်တွင် ထပ်မံ၍ ကြေညာချက် ထုတ်ပြန်ခဲ့သည်။
ညီနောင်မဟာမိတ် သုံးဖွဲ့နှင့် ကချင်လက်နက်ကိုင်အဖွဲ့ (KIA) တို့ ပါဝင်သော မြောက်ပိုင်းမဟာမိတ် တိုင်းရင်းသား လက်နက်ကိုင်အဖွဲ့ လေးဖွဲ့သည် အစိုးရနှင့် အပစ်အခတ် ရပ်စဲရေးစာချုပ် လက်မှတ်ရေးထိုး နိုင်ရေးအတွက် တွေ့ဆုံဆွေးနွေးမှုများ ပြုလုပ်နေသော်လည်း တပ်မတော်နှင့် TNLA၊ AA တို့အကြားတွင်မူ ရှမ်းမြောက်ဒေသနှင့် ရခိုင်ပြည်နယ်တွင် တိုက်ပွဲဖြစ်ပွားမှုများ ရှိနေသည်။
-
မြန်မာ-တရုတ်နယ်စပ် စီးပွားရေး ပူးပေါင်းဆောင်ရွက်မှုဇုန် တည်ထောင်ရေးတွင် မြန်မာနိုင်ငံ၏ နယ်နိမိတ်ပိုင်နက် နယ်မြေဆုံးရှုံးမှု မရှိစေရေး၊ နှစ်နိုင်ငံအကြား နယ်နိမိတ်သတ်မှတ်ချက်ကို အလေးထားဆောင်ရွက်ရန် စီးပွား/ကူးသန်းဝန်ကြီး ပြောကြား
-
မြန်မာနိုင်ငံဆိုင်ရာ ဂျပန်သံအမတ်ကြီးနှင့် ပြည်ထောင်စုဝန်ကြီးတွေ့ဆုံ၍ ဂျပန်နိုင်ငံကူညီမှုဖြင့် ဆောင်ရွက်နေသည့် ရန်ကုန်မြို့ပတ်ရထားလမ်းနှင့် ရန်ကုန် -မန္တလေး ရထားလမ်း အဆင့်မြှင့်တင်ရေးစီမံကိန်းများ ဆွေးနွေး
-
တရုတ်-မြန်မာ နှစ်နိုင်ငံအကြား တိုက်ရိုက်လေကြောင်းခရီးစဉ်ပျံသန်းသည့် ၁၃ ခုမြောက် တရုတ်လေကြောင်းလိုင်းအဖြစ် Qingdao လေကြောင်းလိုင်း နင်းပေါ်-ရန်ကုန် တိုက်ရိုက်လေကြောင်းခရီးစဉ် စတင်ပျံသန်း
-
အမေရိကန်-တရုတ် ကုန်သွယ်ရေးစစ်ပွဲကြောင့် မြန်မာနိုင်ငံသို့ပြောင်းရွှေ့လုပ်ကိုင်လိုသည့် နိုင်ငံတကာလုပ်ငန်းရှင်များရှိသော်လည်း သုံးလအတွင်း မြေနေရာရရှိရေးဆောင်ရွက်မပေးနိုင်သဖြင့် အာဆီယံနိုင်ငံများသို့ သွားရောက်လုပ်ကိုင်နေကြောင်း ဝန်ကြီးနော်ပန်းသဥ္ဇာမျိုး ပြောက
-
၂၀၂၀ ပြည့်နှစ် မော်တော်ယာဉ်တင်သွင်းမှုမူဝါဒဆိုင်ရာ Model Year သတ်မှတ်ချက် ထွက်ရှိလာပြီး မော်တော်ယာဉ်တင်သွင်းမှု အစီအစဉ်အားလုံးတွင် ယခင်နှစ်ထက် ထုတ်လုပ်သည့်ခုနှစ် တစ်နှစ်စီထပ်တိုး
