၂၀၂၀ ပြည့်နှစ်တွင် ဇန်နဝါရီ ဒုတိယအပတ်၌ စတင်မည့် တရားဝင်ဆွေးနွေးပွဲများမှတစ်ဆင့် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) လက်မှတ်ထိုးထားသည့် တိုင်းရင်းသား လက်နက်ကိုင် အဖွဲ့အစည်းများနှင့် ပြည်ထောင်စုငြိမ်းချမ်းရေး ညီလာခံကို ရောက်အောင်သွားနိုင်မည့်အပြင် NCA မထိုးရသေးသည့် အဖွဲ့များနှင့်လည်း ယခုနှစ်အတွင်း လက်မှတ်ထိုးနိုင်ရန် ငြိမ်းချမ်းရေး ကော်မရှင်နှင့် အမျိုးသား ပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) တို့က ဆက်လက်ကြိုးပမ်းသွားမည်ဟု ငြိမ်းချမ်းရေး ကော်မရှင်အကြံပေး အဖွဲ့ဝင် ဦးလှမောင်ရွှေက ကတိပြုပြောကြားသည်။
၂၀၂၀ ပြည့်နှစ် နှစ်သစ်နှုတ်ခွန်းဆက် စကားနှင့် ဆက်လက်ဆောင်ရွက်သွားမည့် ငြိမ်းချမ်းရေး ဖြစ်စဉ်များနှင့် ပတ်သက်၍ နိုင်ငံပိုင်သတင်းစာက ငြိမ်းချမ်းရေးကော်မရှင် အကြံပေးအဖွဲ့ဝင် ဦးလှမောင်ရွှေကို တွေ့ဆုံမေးမြန်းရာတွင် ၎င်းကအထက်ပါအတိုင်း ထည့်သွင်းပြောကြား ခဲ့ခြင်းဖြစ်သည်။
“၂၀၂၀ ပြည့်နှစ် နှစ်ဆန်းကစပြီး ငြိမ်းချမ်းရေးဖြစ်စဉ်ကို အရှိန်အဟုန်နဲ့ ဆောင်ရွက်နိုင်မယ်ဆိုတာ မိဘပြည်သူများကို နှစ်သစ်ရဲ့ မင်္ဂလာသတင်းအနေနဲ့ ပေးပို့အပ်ပါတယ်။ ဇန်နဝါရီလ ဒုတိယပတ်မှာ စတင်မယ့် တရားဝင် ဆွေးနွေးပွဲတွေကနေပြီးတော့မှ တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (Nationwide Ceasefire Agreement - NCA) လက်မှတ်ရေးထိုးထားတဲ့ တိုင်းရင်းသား လက်နက်ကိုင် အဖွဲ့အစည်းတွေနဲ့ ပြည်ထောင်စုငြိမ်းချမ်းရေး ညီလာခံကို ရောက်ရှိအောင် သွားနိုင်မှာ ဖြစ်သလို NCA လက်မှတ် မရေးထိုးထားရသေးတဲ့ အဖွဲ့တွေကိုလည်း ၂၀၂၀ ပြည့်နှစ်အတွင်းမှာ လက်မှတ်ရေးထိုးနိုင်ဖို့ ကျွန်တော်တို့ ငြိမ်းချမ်းရေးကော်မရှင်ရော၊ အမျိုးသားပြန်လည် သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) ကပါ ဆက်လက်ကြိုးပမ်းမယ် ဆိုတာကိုလည်း အသိပေး တင်ပြအပ်ပါတယ်” ဟု ဦးလှမောင်ရွှေက ပြောကြားသည်။
ထို့ပြင် ရခိုင်ပြည်လွတ်မြောက်ရေးပါတီ (ALP) မှ ပြည်ထောင်စုငြိမ်းချမ်းရေး ဆွေးနွေးမှု ပူးတွဲကော်မတီ (UPDJC) အတွင်းရေးမှူးအဖွဲ့ဝင် စောမြရာဇာလင်းကလည်း တိုင်းပြည်အေးချမ်းသာယာရန် တိုက်ပွဲများတွင် ပါဝင်ပတ်သက် နေကြသူများအားလုံး တိုင်းပြည်ငြိမ်းချမ်းရေးကို ရှေးရှု၍ တိုင်းပြည်ကောင်းစားရေးအတွက် ဦးတည်ဆောင်ရွက်ကြဖို့ အလေးထား တိုက်တွန်းလိုကြောင်း ပြောကြားသည်။
“အထူးသဖြင့် ရခိုင်ပြည်နယ်ရဲ့ အရေးဟာ ပိုမိုအရေးကြီးပါတယ်။ အသက်အိုးအိမ် လုံခြုံမှုနဲ့ အားလုံး စိတ်ချမ်းသာဖို့ဆိုရင် ဖြစ်ပွားနေတဲ့ စစ်ပွဲတွေကို ရပ်ဆိုင်းဖို့ အရေးကြီးပါတယ်။ တိုင်းပြည်အေးချမ်းသာယာဖို့
အတွက် တိုက်ပွဲတွေမှာ ပါဝင်ပတ်သက် နေကြသူများအားလုံး တိုင်းပြည်ငြိမ်းချမ်းရေးကို ရှေးရှုပြီးတော့မှ တိုင်းပြည်ကောင်းစားရေးအတွက် ဦးတည်ဆောင်ရွက်ကြဖို့ အလေးထား တိုက်တွန်းလိုပါတယ်” ဟု နိုင်ငံပိုင်သတင်းစာနှင့် တွေ့ဆုံမေးမြန်းခန်းတွင် ၎င်းက ထည့်သွင်းပြောကြားသည်။
ငြိမ်းချမ်းရေးဖြစ်စဉ် တည်ဆောက်မှု အောင်မြင်လိုပါက နိုင်ငံရေးဆွေးနွေးမှုနှင့် နိုင်ငံရေး ပြုပြင်ပြောင်းလဲမှုများကို တစ်ပြိုင်တည်း ပြုလုပ်ရန်လိုအပ်ကြောင်း ပအိုဝ်းအမျိုးသား လွတ်မြောက်ရေးအဖွဲ့ (PNLO) ဒုတိယဥက္ကဋ္ဌ ခွန်မြင့်ထွန်းက ထောက်ပြပြောဆိုသည်။
“ကျွန်တော်တို့ ပအိုဝ်းအမျိုးသား လွတ်မြောက်ရေး အဖွဲ့ချုပ်အနေနဲ့ ပြောရမယ်ဆိုရင် အခုငြိမ်းချမ်းရေး ဖြစ်စဉ်ဟာ အရင်ငြိမ်းချမ်းရေးဖြစ်စဉ်နဲ့ မတူတဲ့အချက် နှစ်ချက် ရှိပါတယ်။ (၁) နိုင်ငံရေး ဆွေးနွေးမှုအပေါ်မှာ အခြေခံတယ်။ (၂) ပြည်သူလူထုပါဝင်မှုကို အခြေခံတယ်။ ငြိမ်းချမ်းရေးဖြစ်စဉ် တည်ဆောက်မှု အောင်မြင်ဖို့ဆိုရင် နိုင်ငံရေး ဆွေးနွေးမှုနဲ့ နိုင်ငံရေးပြုပြင် ပြောင်းလဲမှုတွေ တစ်ပြိုင်တည်း လိုအပ်တာ ဖြစ်ပါတယ်။ ယနေ့ငြိမ်းချမ်းရေးဖြစ်စဉ်၊ နိုင်ငံရေးပြောင်းလဲမှု ဖြစ်စဉ်တွေကို ခေါင်းဆောင်တွေ၊ လက်နက်ကိုင်ထားတဲ့သူတွေ လက်ထဲမှာပဲ ထားလို့မရပါဘူး။ ကျွန်တော်တို့ ပြည်သူလူထုကပါ အားလုံးအတူတကွ ပူးပေါင်းပြီး ဖော်ဆောင်ရမှာ ဖြစ်ပါတယ်” ဟု နိုင်ငံပိုင်သတင်းစာနှင့် တွေ့ဆုံမေးမြန်းခန်းတွင် ၎င်းကပြောကြားသည်။
NCA လက်မှတ်ရေးထိုးထားသော တိုင်းရင်းသားလက်နက်ကိုင် အဖွဲ့အစည်းများအနေဖြင့် ၂၀၂၀ ပြည့်နှစ် အထွေထွေ ရွေးကောက်ပွဲမတိုင်မီ ပြည်ထောင်စုငြိမ်းချမ်းရေး ညီလာခံကို တစ်ကြိမ်ကျင်းပနိုင်ရေး ရည်မှန်းထားကြောင်းနှင့် ရွေးကောက်ပွဲအလွန် တက်လာမည့် အစိုးရနှင့်လည်း ငြိမ်းချမ်းရေး လုပ်ငန်းစဉ်များ ရှေ့ဆက်သွားနိုင်ရေးအတွက် ပြင်ဆင်ဆောင်ရွက်နေကြောင်း နိုင်ငံပိုင်သတင်းစာနှင့် တွေ့ဆုံမေးမြန်းခန်းတွင် မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) ဒုတိယဥက္ကဋ္ဌ ဦးမျိုးဝင်းက ပြောကြားသည်။
“၂၀၂၀ ပြည့်နှစ် ရွေးကောက်ပွဲတွေ မတိုင်ခင် ငြိမ်းချမ်းရေးညီလာခံ တစ်ကြိမ်ကျင်းပနိုင်ရေးကို ရည်ရွယ်ပါတယ်။ အောင်မြင်အောင် ကျင်းပနိုင်ရေးအတွက် ရည်ရွယ်ထားတယ်။ ရွေးကောက်ပွဲ အလွန်မှာလည်း နောက်တက်လာမယ့် အစိုးရနဲ့ ငြိမ်းချမ်းရေးလုပ်ငန်းစဉ် ရှေ့ဆက်သွားနိုင်ရေးအတွက် ပြင်ဆင်ဆောင်ရွက်နေမှာ ဖြစ်ပါတယ်။ ၂၀၂၀ ပြည့်နှစ်အတွင်းမှာ ငြိမ်းချမ်းရေး လုပ်ငန်းစဉ်ကို ဒီထက်မက ဆောင်ရွက်နိုင်လိမ့်မယ်။ ကြိုးပမ်းအားထုတ်နိုင်လိမ့်မယ်လို့ ကျွန်တော် မျှော်လင့်ပါတယ်။ ယုံလည်း ယုံကြည်ပါတယ်” ဟု ဦးမျိုးဝင်းက ဆိုသည်။
-
မြန်မာ-တရုတ်နယ်စပ် စီးပွားရေး ပူးပေါင်းဆောင်ရွက်မှုဇုန် တည်ထောင်ရေးတွင် မြန်မာနိုင်ငံ၏ နယ်နိမိတ်ပိုင်နက် နယ်မြေဆုံးရှုံးမှု မရှိစေရေး၊ နှစ်နိုင်ငံအကြား နယ်နိမိတ်သတ်မှတ်ချက်ကို အလေးထားဆောင်ရွက်ရန် စီးပွား/ကူးသန်းဝန်ကြီး ပြောကြား
-
မြန်မာနိုင်ငံဆိုင်ရာ ဂျပန်သံအမတ်ကြီးနှင့် ပြည်ထောင်စုဝန်ကြီးတွေ့ဆုံ၍ ဂျပန်နိုင်ငံကူညီမှုဖြင့် ဆောင်ရွက်နေသည့် ရန်ကုန်မြို့ပတ်ရထားလမ်းနှင့် ရန်ကုန် -မန္တလေး ရထားလမ်း အဆင့်မြှင့်တင်ရေးစီမံကိန်းများ ဆွေးနွေး
-
တရုတ်-မြန်မာ နှစ်နိုင်ငံအကြား တိုက်ရိုက်လေကြောင်းခရီးစဉ်ပျံသန်းသည့် ၁၃ ခုမြောက် တရုတ်လေကြောင်းလိုင်းအဖြစ် Qingdao လေကြောင်းလိုင်း နင်းပေါ်-ရန်ကုန် တိုက်ရိုက်လေကြောင်းခရီးစဉ် စတင်ပျံသန်း
-
အမေရိကန်-တရုတ် ကုန်သွယ်ရေးစစ်ပွဲကြောင့် မြန်မာနိုင်ငံသို့ပြောင်းရွှေ့လုပ်ကိုင်လိုသည့် နိုင်ငံတကာလုပ်ငန်းရှင်များရှိသော်လည်း သုံးလအတွင်း မြေနေရာရရှိရေးဆောင်ရွက်မပေးနိုင်သဖြင့် အာဆီယံနိုင်ငံများသို့ သွားရောက်လုပ်ကိုင်နေကြောင်း ဝန်ကြီးနော်ပန်းသဥ္ဇာမျိုး ပြောက
-
၂၀၂၀ ပြည့်နှစ် မော်တော်ယာဉ်တင်သွင်းမှုမူဝါဒဆိုင်ရာ Model Year သတ်မှတ်ချက် ထွက်ရှိလာပြီး မော်တော်ယာဉ်တင်သွင်းမှု အစီအစဉ်အားလုံးတွင် ယခင်နှစ်ထက် ထုတ်လုပ်သည့်ခုနှစ် တစ်နှစ်စီထပ်တိုး
