Top News

အခုတစ်ပတ် အားလပ်ရက်ကတော့ အချိန်အခါမဟုတ် မိုးရွာသွန်းမှုတွေနဲ့အတူ အေးမြနေဆဲ ရက်သတ္တပတ်တစ်ပတ်လို့ ဆိုရပါမယ်။ ဒီတစ်ပတ်ရဲ့အားလပ်ရက်မှာ အနုပညာဖျော်ဖြေပွဲတွေက စောင့်ကြိုနေသလို အိမ်မှာနေရင်း အပန်းဖြေလိုသူတွေအတွက် လည်း ရုပ်သံအစီအစဉ်ကောင်းတွေကို ရွေးချယ်ခံစားကြည့်ရှုရင်း ဖြတ်သန်းနိုင်မှာပါ။ ဒီတစ်ပတ်မှာတော့ ရွေးချယ်စရာများပြား လှတဲ့ဖျော်ဖြေပွဲတွေထဲက ရော့ခ်ဂီတချစ် ပရိသတ်တွေ ရွေးချယ်ခံစားနိုင်မယ့် ဂီတဖျော်ဖြေပွဲတစ်ပွဲကို ညွှန်းဆိုဖော်ပြပေးချင်ပါတယ်။
Big Bag နဲ့ ဂျီလတ်တို့ရဲ့ Accoustic ဂီတဖျော်ဖြေပွဲကို အောက်တိုဘာ ၂၉ ရက် မှာ ရန်ကုန်မြို့ မြရိပ်ညိုဟိုတယ်မှာ ပြုလုပ်ဖို့ စီစဉ်ထားတာပါ။Youk $hi Accoustic  လို့ နာမည်ပေးထားတဲ့ ဒီဂီတဖျော်ဖြေပွဲက တစ်မူထူးခြားတဲ့ ရော့ခ်ဂီတတေးသံရှင်နှစ်ဦးရဲ့ တွဲဖက်ပြုလုပ်မယ့် ဂီတဖျော်ဖြေပွဲပဲဖြစ်ပါတယ်။ ဒီပွဲမှာ Big Bag ပရိသတ်တွေအတွက် အဆိုတော်ကျားပေါက်ရဲ့ တေးသီချင်းတွေကို နားဆင်ခွင့်ရမှာဖြစ်သလို ရှိုးပွဲတွေမှာ ကြည့်ခွင့်မရတာကြာပြီဖြစ်တဲ့ အဆိုတော် ဂျီလတ်ရဲ့ တေးသီချင်းတွေနဲ့ ဖျော်ဖြေမှုတွေကိုလည်း တဝကြီးခံစားခွင့်ရမှာပါ။ တေးသံရှင်ဂျီလတ်က NC ၁၃  တီးဝိုင်းနဲ့တီး ခတ်ဖျော်ဖြေမှာဖြစ်ပြီး NC ၁၃ နဲ့ဂျီလတ်တို့ ပေါင်းစည်းတင်ဆက်မှုရသကို အပြည့်အ၀ ခံစားရရှိနိုင်မှာပါ။
ဖျော်ဖြေပွဲကို ည ၇ နာရီအချိန်မှာစတင်မှာဖြစ်ပြီး ဧည့်သည်တေးသံရှင်တွေ အနေနဲ့ The Marionette နှင့် Emily Bo တို့က ပါဝင် သီဆိုဖျော်ဖြေပေးကြမှာပါ။ ဒီနောက်မှာ တော့Big Bag နဲ့ ဂျီလတ်တို့က တစ်ဖွဲ့ချင်းစီ တေးသီချင်းများစွာနဲ့ သီဆိုဖျော်ဖြေပေးကြမှာပါ။ တေးသံရှင်ဂျီလတ်ကတော့ အစွန်းနှစ်ဖက် တေးစီးရီးထဲက တေးသီချင်းအများစုကို သီဆိုသွားမယ့်အပြင် အခြားထင်ရှားတဲ့ တေးသီချင်းများစွာကိုလည်း ဖျော်ဖြေဖို့စီစဉ် ထားပါတယ်။
ဒီဖျော်ဖြေပွဲနဲ့ပတ်သက်လို့ ပါဝင်မယ့် တေးသံရှင်ကျားပေါက်က “ကျွန်တော်တို့ဒီ နှစ်ထဲတော့ ရှိုးဆိုဖြစ်တာ နည်းနည်းများပါ တယ်။ Tour တွေရော ရိုးရိုးရှိုးတွေရောဆိုတော့ ပွဲတော့နည်းနည်းများတယ်။ သီချင်း တွေထပ်မှာ ကျွန်တော်တို့အတွက်က သိပ်စိတ်ပူစရာမရှိဘူး။ သီချင်းပုဒ်ရေ ရာနဲ့ချီရှိနေတော့ တစ်ပွဲနဲ့ တစ်ပွဲက ပုံစံလုံးဝတူမှာ မဟုတ်ဘူး။ သေချာတယ်။ ဒီပွဲကလည်း ထူးထူးခြားခြားလေး ဖြစ်မှာပါ။ ကျွန်တော်တို့ သေချာလေးပြင်ဆင်ထားတယ်” လို့ ဆိုပါတယ်။
“ဒီပွဲကထူးခြားပါတယ်။ ကျွန်တော့် အနေနဲ့ ဒီပွဲအတွက် ကိုတော်တော်လေးပြင် ဆင်ထားပါတယ်။ အစွန်းနှစ်ဖက်အခွေထဲက သီချင်းတွေ အများစုဆိုဖြစ်ပါမယ်။ တစ်ခွေလုံးနီးပါး ဆိုဖို့ရှိမယ်။ Version လေးတွေလည်း ပြောင်းပြီးဆိုဖြစ်ပါမယ်။ ကျွန်တော့် ပရိသတ်တွေအတွက်တော့ ထူးခြားမယ် ထင်ပါတယ်” လို့ တေးသံရှင်ဂျီလတ်ကလည်း ပြောပါတယ်။
Big Bag နဲ့ ဂျီလတ်တို့ရဲ့ ဂီတဖျော်ဖြေပွဲ လက်မှတ်တွေကို ငွေကျပ် ၉၀၀၀ နဲ့ သတ် မှတ်ရောင်းချနေတာပါ။ ဒါကြောင့် ဒီတစ်ပတ်မှာတော့ ရော့ခ်ဂီတကိုနှစ်သက်အား ပေးတဲ့ပရိသတ်တွေ အတွက်တော့ ရော့ခ်သံစဉ်တွေကြားမှာ ဖြတ်သန်းရင်း အားလပ်ချိန် တွေကို ဖြတ်သန်းနိုင်မှာပါ။ တစ်ပတ်တာရဲ့ နေ့ရက်တွေကို ဖြတ်သန်းပြီးချိန်မှာ ရောက်ရှိလာတဲ့ အားလပ်ချိန်တွေက တန်ဖိုးရှိလှပါတယ်။ ဒါကြောင့်ဒီတစ်ပတ်ရဲ့ အားလပ်ချိန်တွေကို အကောင်းဆုံးအသုံးချရင်း ရောက်ရှိလာမယ့် နေ့သစ်တွေအတွက် အကောင်းဆုံးပြင်ဆင် နိုင်ပါစေလို့ ဆုတောင်းပေးလိုက် ရပါတယ်။